大專盃告一段落，城大男排最終得第二，不甘心，真的不甘心，回想最後第四局落後20：24之際打出一段小高潮追到25:24然後再被逆轉26:28，很可惜…
這是我第二年參加大專盃，部份主力仍然留隊，應該很大機會奪冠吧。加上，與隊友們磨合得七七八八，即使在小組賽中遇到強勁的對手亦無法阻擋我們爭冠的決心，共同進退…是基本啦！
對手中文大學有2名港隊主將，易子軒和蕭昌鴻，識於微時的港隊隊友，分別相識了10年和9年，由青年隊到香港隊，大家對大家的打法和習性十分熟悉，成為敵人實在有點兒不爽，不過球場如戰場，無分朋友。
回想過去幾年大學生活，我曾經諗過求求其其Hea左4年大專盃，平日做體能唉聲嘆氣咁過，結果上年就”瀨嘢”，永遠同鎚手作對，堅持己見，認為自己升啲波最適合大家既打法，當去到最後一場波既時候，就發現想補救已經太遲，根本無時間去配合。
無錯，呢個就係我，固執的鍾偉時。
比人批評點點點，跟其他Setter比下去，但我仍然覺得自己有自己既風格， 自己唔會比人差，但自從去年去完世界大學生運動會之後，真心覺得自己有好多不足。可惜，時間過得太快…
今年大專盃，無論做體能又好，練波又好，比左好多心機出黎，唔敢話做得非常好，不斷睇自己比賽既Video，應該點先可以做好啲，令到隊友次次一對一打得舒服啲。
場外既，年初提議去呀Sir屋企拜年，隊友大家多啲時間傾計，隊友關係好啲做乜都容易啲，練完波一齊食下飯打下機咁。
為左個決賽，前兩晚都喺屋企瞓，希望多啲精神應付場比賽，仲叫左爸爸黎睇波。
爸爸第一次睇我落場比賽（之前黎過一次但我喺Bench無機會落場）爸爸話「你打得好好，睇到好緊張，輸佐唔緊要啦，下次再黎過啦」最後，我忍到佢走佐先喊，喊唔係因為我輸，而係救唔到隊波，當最後20：24追到25:24我以為真係可以好似冠軍球會盃同馬拉松咁反勝，但最後我FF得太多…
大專盃決賽，唔好話失落大專盃冠軍，應該調轉講，同大專盃冠軍行近佐一步。
接下來的日子，希望自己更成熟。