諗起以前細細個，夜少少出街都會比屋企人話，十一點後想出門口，如果無特別原因基本上都唔洗諗，要出，就要度橋，諗定一大堆理由藉口。
而家唔同啦，就算返朝9晚5，超過11點仲未返歸既都大有人在，不過人大左就一樣要度橋諗藉口，無他既，以前細個屋企人驚你危險，而家呢？報到呀嘛，畢竟夜媽媽唔返屋企又真係令身邊人有好多古靈精怪既諗法既，唔諗個好d既藉口，就真係好似司徒夾帶條短片一樣，「搵鬼信」咩！
況且而家香港打工有幾惡劣真係心照啦，話就話5點放工但分分鐘89點先走得人，放工之後又唔甘心食個hea飯就咁訓到第二朝，硬係想搵d野玩下開心下，好啦，約d老死出黎飲兩杯，呢個又話條女唔比，果個又話湊仔湊女，好啦，退而求次，一齊上網打下機呢？又嘈住屋企人休息，oh come on，仲可以點？
夏體硬陣中就有唔少人呢類煩惱，贊助商NIKE早排就連續兩個禮拜，包起觀塘一個室內五人足球場，比我地呢班收又收得夜，就黎悶到謝既傳媒人踢下波解悶，當我地一聽到book既時間係夜晚11點至3點，大家都怕無乜人會真係出黎陪我地癲，點知第一晚就幾乎要開兩個場先招呼得曬咁多人，皆因出黎踢既唔單止我地呢班夠曬熱血既隊友，就連一D隊友既朋友，返朝9晚5 office hour既老友都拎曬permit出黎跟隊鬥波，結果成班大男人就開開心心踢足一晚。
唔踢過都唔知，原來深夜踢波再去食個宵夜，都真係幾爽 !
國足主
