【體路專訊】香港壁球壇第2位土生土長亞洲冠軍誕生！世界排名第16位的李浩賢（Max）首次打入決賽就一擊即中，今日（30日）於印度舉行的亞洲錦標賽男子爭霸戰，在先失一局劣勢下連扳三城，最終以總局數3：1逆轉佔主場之行的高素（Saurav Ghosal），首嘗金牌滋味。總結今次印度之行，港隊共袋走1金3銅佳績。
以頭號種子身份出賽的李浩賢在晉級過程中一直展示「弗」爆狀態，他今日座擁主場之利的2號種子高素爭標，始終是首次在決賽亮相，經驗豐富如Max也會手緊，以5：11先失一局，不過站穩陣腳後，他逐漸掌控比賽節奏，第2局開波即取得領先優勢，被追至4：5後連贏6分，以11：4扳平，之後愈打愈順，最終再下兩城11：8、11：7反敗為勝封王。
29歲的李浩賢是繼歐鎮銘上屆（2015年）歷史性奪魁後，第2位捧走亞洲壁球賽錦標賽的「土炮」男將，現任港隊教練的前港隊代表簡化謙亦曾於1992年奪金。歐鎮銘今次雖然4強出局，衛冕失敗，但仍獲得一面銅牌。女子方面，昨日雙雙在4強止步的歐詠芝及湯芷穎亦有銅牌進賬。
李浩賢賽後表示：「好耐冇贏過比賽，經歷了低潮，所以今次參賽都有壓力。打咗亞洲賽咁多年，好多時都喺第2圈或8強輸波，今屆終於贏到8強，最終更贏埋冠軍，好多嘢都估計唔到，我都唔知講咩好！好開心囉！」共獲一冠三季佳績的港隊大軍將於明（5月1日）早由印度凱旋。
相片來源：Squashsite