【體路專訪】新一季菁英盃明天（28日）揭開戰幔，由於賽事規定每隊每場必定要同時有兩名U22球員在陣，可以預料將會有不少新面孔亮相，剛於冠忠南區展開職業生涯的于楊可能會是其中一位。
于楊現年16歲，自少已跟隨南華名宿陳志康及陳振宇接受正規訓練，之後在太陽國際（前名太陽飛馬）成名，也是香港青年軍成員。這位擅踢左路進攻位置的射手，令人最深印象的就是其踢法極具侵略性，而且有遠射能力，青年軍時代曾為太陽國際射入不少世界波。作為其啟蒙教練，陳振宇對愛將的評價是：「教咗于楊都有7、8年，見到佢有機會踢頂級聯賽都感到好安慰，佢好細個已經比同齡甚至大1、2年嘅球員成熟，最欣賞佢嘅膽色同埋盤扭技術，射波準繩度都唔錯，不過個衰仔有好多嘢要改善，例如基本控、傳，同埋場上態度。我已經同一啲相熟嘅南區球員，好似梁子駿咁，要幫我好好睇住佢。」
就在落實加盟南區之前，于楊年初獲選為香港唯一的男子代表，到德國拜仁慕尼黑參加一年一度的「安聯少年足球營」，回想起來，這位小將仍然回味無窮：「我哋去咗6日，同25個國家共50幾個球員一齊，跟隨拜仁青訓教練操練（其中一人為名將歐真泰拿）。」第一次海外接受迎練，就令到于楊體會自己同外國球員嘅差距：「好多人本身係嚟自國內出名球會，有啲更加已經係代表隊成員，表現最突出嘅係阿根廷同埋哥倫比亞球員，至於嚟自東南亞嘅就速度好快，個個都係實力非凡。」
「令我感受最深嘅，就係佢哋決心非常大，因為佢哋細細個已經決定以踢波為終身職業，而且仲要踢到去外國先有前途，所以一定要成功。（你依家只係中四，未來又會點呢？）有機會踢港超，今季會畀自己試下，好慶幸家人好支持我踢波，不過書一定要讀，最少都要上到大學，如果中六考到獎學金，就可能會去英國邊讀邊踢，不過到時都要睇下發展成點先，其實去唔去外國都好，都好睇自己心態，如果個心唔想繼續進步，去邊度踢都一樣。」除此之外，于楊原來亦已聽從太陽國際體能教練賴沛憶建議，生活上完全謝絕快餐及汽水，現時一周仍會健身兩次，主要強化上身肌肉。看不出年紀少少，已經有如此視野，比起不少職業球員更加職業。
于楊今季以16歲之齡越級踢U18青年聯賽及預備組賽事，出賽5場共射入12球，在新球會可說是有個完美開局，不過他明言：「我目標係港超上陣，青年軍同預備組入幾多球都無意思，上到去係另一回事！」現時一星期會踢隨南區一隊練波4天的他又笑言，會把握機會向蘇沙偷師，希望學到一招半式。于楊的好友也特別為他開設了 Facebook專頁，讓外間能夠多點留意這位新晉港超腳！
文：文森特／圖：由受訪者提供