【體路專欄】上集我介紹咗足球場上各個中堅類型同特色，今集會講吓佢哋左右手 — 閘位球員。有踢開波嘅球迷都知道，通常分隊揀位置大多數都係揀淨閘位同守門員，而被安排去「打閘」嘅球員都係受到隊友「特別關照」。不過，踢閘位並非等閒之輩可以駕御，落到場要助攻助守，睇準時機跑上跑落，少啲體力都應付唔到。
穩陣型 — 艾斯比列古達、柏華
話明係穩陣型，當然踢法上穩打穩扎，不求有功但求無過。球員特性傾向單對單防守較強，利用純熟防守步法左右轉移，靜待最適合時機進行攔截。若然時機唔成熟，會以最保守方法向後移步，延長對方進攻時間，等待隊友回防支援。的而且確呢類型球員會較為專注防務工作，甚少上前參與助攻，但隨着現今足球對每位球員都需要攻守兼備，穩陣型閘位會略為輸蝕。
出擊型——阿歷山大阿奴、佐迪艾巴
要數到現今最搶手閘位就梗係出擊型球員，絕對係配合現時進攻足球風格。大部分出擊型閘位都係攻強於守，甚至有可能本身係翼鋒出身，移後一格改打閘位。球員意識形態上會較為進取，積極上前參與助攻，同翼鋒球員配合製造「2 vs 1」或「2 vs 2」情況，務求令對手邊路防線overload繼而取得優勢。不過，上得去攻亦未必能夠每次都可以回防，絕對需要防守中場幫忙補位，以免被敵人利用後上進攻時所遺留嘅防守空間。
頻率型——奧迪里奧蘇拿、域基朗
穩陣型偏向防守，出擊型偏向進攻，頻率型就係兩者之結合，喺場上不斷來來回回參與進攻同防守，球員本質攻守兼備之外，需覆蓋場上邊路全部範圍，對體能要求極高，所以係唔少教練夢寐以求嘅閘位球員。不過，要做到兩者同樣出色相當困難，加上球員自覺「跑得」而忽略了頭腦上決定性（Decision Making），只顧跑不願思考。而隨著比賽經驗豐富及年紀漸大，球員亦會慢慢轉為其他類型，因此，頻率型大多出現喺年青力壯球員身上。
終極攔截型——雲比沙卡
凡事總有例外，總有突破盲點一刻。曼聯右閘雲比沙卡近年火速冒起，其個人專長及特色並唔屬於以上3個類型，如果夾硬要選擇，佢係傾向穩陣型。強橫身體對抗質素及準繩攔截係雲比沙卡象徵，普遍閘位球員較為靈巧，而且並唔會俾進攻球員容易轉身並運球推向自己，因為呢個時刻進攻球員正處於主動，防守球員處於被動。不過，雲比沙卡恰好相反，絕對歡迎進攻球員輕易轉身並運球推向自己，令自己變成「主動」狀態。呢個踢法完全有違過去普遍防守球員或閘位球員慣性及定律，雲比沙卡將會成為終極攔截型先驅！
足球係團隊運動，場上所有每個位置都有自己嘅責任同任務。姑勿論比賽當日發揮如何，都要竭盡所能，問心無愧，着得起件波衫，就要對得住自己、隊友、教練、球迷以至家人，一定唔可以放棄，堅持到底。踢閘位嘅朋友仔再唔好諗住自己「打閘」係隊中可有可無，係時候要改變諗法，要喺球場上付出同貢獻更多。