【體路專欄】對青年球員嚟講，最珍貴同重要非出場機會莫屬。阿仙奴自從改由領隊阿迪達上任後，明顯地重視球隊青訓工作，為青年球員提供一定上陣機會，包括薩卡、祖斯夫韋歷克、基迪亞、域斯尼爾遜等。當中薩卡備受重用，復賽後7場比賽有6場正選出戰，對狼隊比賽更射入職業生涯第1個英超入球，以18歲303日成為球隊史上英超第2位最年輕入球球員，僅次於張柏倫嘅18歲173日。
身形矮小有速度 頭腦靈活轉數高
青年球員初出道最緊要勇敢嘗試，唔好怕失敗，因為你失敗，都係大家預料中嘅事。所以，一有機會就要好好把握，無論踢咩位置都好，都要盡你最大能力去表現自己。薩卡起初擔任左翼及左閘，到現時右翼及左右進攻中場都踢過，即使踢唔同位置，從來毫無怨言，場上表現完全反映佢每一場都係進步當中。雖然薩卡身形較為矮小，但速度、爆發力及決定性等絕不遜色，而深厚傳控球技術令佢能夠勝任中前場多個位置，目前情況更成為球隊中前場不可或缺嘅突破點。
覆蓋範圍夠晒大 後上入楔好鬼快
現今球員除咗需要攻守兼備外，體能、身體對坑性、足球知識及心理質素等全部缺一不可。薩卡喺球場上經常滿場飛，踼閘位同翼位能夠同時參與進攻同防守都係非常基本。較早前阿迪達安排佢踢靠左進攻中場，當左翼奧巴美揚內切移到中鋒位嘅時候，薩卡就會移到邊路以左翼姿態出現，球隊即時由4-3-3陣式變為4-4-2，整體效果非常不錯。此外，佢嘅跑動令中前場充滿活力，周不時會後上殺入禁區搵入波機會。無波跑動（Off Ball Movement）不但能夠為隊友製造更多空間，重可以擾亂敵方防守位置，為球隊爭取更大進攻利益。
學海無涯，人總要不斷保持學習先可以增值自己，要變得更強嚟應付每一場硬場。薩卡前途一片光明，必須要保持謙卑之心繼續學習，只要比賽經驗逐漸增加，場上表現就會愈嚟愈穩定，相信薩卡將來一定會成為球隊核心，帶領兵工廠重返巔峰！