【體路專欄】隨着政府慢慢開放部份戶外設施，各位球迷係咪急不及待想快啲開返足球場同籃球場呢？嗱嗱嗱，有啲嘢真係唔急得，好似千呼萬喚嘅FIFA 21咁，試玩版最快都要等到9月尾，10月頭先至正式開售。雖然暫時未有得玩住，不過，早前官方網站出咗預告片，我哋都可以望梅止渴，等我同大家介紹吓FIFA 21教練生涯模式比起上一集有咩唔同啦！
FIFA21教練生涯模式—財政預算
真正開始教練生涯模式之前，你可以喺財政接管按扭（Financial Takeover）大大增加球隊轉會費同人工預算（可參考圖2），最高可以選擇5億歐羅，絕對係人格大考驗！實行考下你有幾老實，想唔想試吓限米煮限飯嘅感覺，如果第一季就想砌到Dream Team嘅就容易好多。最後，喺董事會目標入面會有新要求，例如要求主場及作客分別保持不敗或連勝記錄等。
FIFA21教練生涯模式—青訓
今集新增6個球探國家，包括阿爾巴尼亞、愛沙尼亞、立陶宛、拉脫維亞、摩爾多瓦、烏克蘭同威爾斯。此外，你可以睇到青訓球員逆足能力，效率同特質等資訊（可參考圖3）。今集青訓最吸引嘅地方係可以為青訓球員訓練新位置同踼法（可參考圖4），隨時隨地按照球隊需要，重點培訓你所需要嘅位置同戰術球員，分分鐘可以訓練幾個球星，再賣出去賺一大筆錢。
FIFA21教練生涯模式—轉會
操作球隊轉會絕對係大多數玩家玩教練生涯模式嘅原因，今集絕對係遊戲商正面回應各大玩家一直嘅訴求。首先係球員外借情況，自家青訓產品喺首季升上一隊之後可以立刻外借或賣走。其次，如果你想從AI球隊借入球員，AI球隊會根據球員合約長度，球隊板凳深度及球員重要性決定借唔借，而且仲有機會要求玩家直接買斷，拒絕外借。第三，進行買賣轉會時候，你可以選擇先借後買條款（可參考圖5），非常真實！當然，AI球會向你球隊報價時，你都可提出換人交易（可參考圖6）。
除咗以上改變之外，上集教練生涯模式最屈機地方係免簽球員，即使球隊財政預算唔高，仍然可以價廉物美簽入完約球星。不過，今集呢招就未必行得通，AI球隊會主動為球員續約，提升免簽難度。最後，如果你想同宿敵球會進行交易相對較難，而球員亦唔太願意轉投較低組別聯賽效力，ONE CLUB MEN嘅球員更加唔使講，基本上係唔會轉會。所以，今集轉會增設更真實情景同投射咗球員情感，真係要花多少少時間先可以砌隊Dream Team出嚟。
FIFA21教練生涯模式—訓練
上集透過訓練可以提升球員能力，今集呢方便已經唔再係咁簡單，你需要自己安排球隊訓練日程，例如球隊訓練日、恢復訓練日同休息日。球隊訓練目的係維持球員體能，士氣同比賽鋭度，因此，訓練日程會影響球員相關數值，對球員比賽總戰力有好大影響（可參考圖7。其次，球員個人訓練亦都新增訓練新位置（可參考圖8）、踢法、技術動作、逆足能力及進攻防守效率。
FIFA21教練生涯模式—比賽
做咗咁多功夫，終於可以真正比賽。今集比賽前同比賽後都會有簡單記者會，而每位球員嘅反應亦會直接影響場上表現。另外，你可以選擇快進比賽，喺比賽任何時間隨時”JUMP IN”同”JUMP OUT”（可參考圖9），名副其實彈出又彈入。排陣方面，其中一個特點係如果你將球員位置錯配會影響總戰力，陣式上會有標誌彈出提醒（可參考圖10）。至於球員名字嘅能力顯示值旁邊會顯示戰力+/-（可參考圖10），例如90+5，90能力值嘅球員喺場上會好似95戰力球員。不過，你提升時AI都會提升，今集佢哋特別加強咗防守Mark人同剷波能力，同時亦提升AI球員進攻盤球同傳球能力。講到咁吸引，係咪好想即刻玩呢？諗吓好啦，繼續等多陣啦⋯⋯