【體路專欄】新一季英超喺周末開鑼，第一周賽事合共上演8場比賽，曼市雙雄因早前參加歐洲賽事較遲完季，而獲得英格蘭足總特事特辦有更多時間休息。揭幕戰由升班馬富咸迎戰阿仙奴上演倫敦打吡，另外，利物浦對列斯聯及熱刺對愛華頓都會係較矚目嘅比賽。
球例新解釋 你又識唔識？
簡略分析部分球隊之前，特別要提提各位球迷今季英超將會喺指定球例加以闡述，首當其衝當然係手球，其次係插水。手球球例一向都惹來爭議，好多時候球員同球迷都難以理解球證嘅判決，英超賽會今季特別指明手球嘅身體部份（可參考上圖）。若然入球過程中，入球球員犯手球後「直接」入波將被判入球無效（Handball+Immediate=No Goal）；若然入球過程中發生疑似手球後「間接」出現入球，入球將判有效（Handball+Not Immediate=Goal）。最後，球證今季會加強使用場邊電視螢幕執行VAR（Video Assistant Referee）工作，若然球員出現插水行為會被罰黃牌，而如果球員因插水而獲得12碼或令敵方球員紅牌出場，足總賽後有權向相關球員追究並罰停賽兩場。
Big6變Big8 隊隊有特色
要數到今季英超最積極擴軍球隊，梗係非車路士莫屬，前前後後經已買咗6名新兵（可參考上圖），中堅泰亞高施華能夠彌補後防經驗不足；施耶殊、添姆雲拿及夏維斯能增強前線創造力及爆破力，每一個收購都係對症下藥，令球隊實力有增無減。上季冠、亞、季軍利物浦、曼城、曼聯並無大肆擴軍，球隊板凳深度及後備力量成疑，若以現時陣容迎戰聯賽及歐聯，對領隊高普、哥迪奥拿及蘇斯克查確實有一定挑戰性。
阿仙奴早前擊敗利物浦奪得社區盾冠軍，比賽過程再次顯示領隊阿迪達執教威力，短時間內重整球隊防線，球員場上踢得極具紀律性，利用奧巴美揚快速反擊成為球隊贏波最大殺著。至於上季表現較失色嘅熱刺及愛華頓喺加上名帥摩連奴及安察洛堤執掌下，新一季表現絕對令人期待。論球隊人腳及質素並唔失禮，唯獨球員場上表現欠缺穩定性，集中度及攻守轉換仍然有待提升，「拖肥糖」方面且看占士洛迪古斯加盟後能適應英超，分擔施古臣隊中進攻重責。
距離英超轉會窗完結仲有一段時間，每隊都密鑼緊鼓希望增兵加強實力，當中紐卡素一改「慳家」作風一口氣連簽5位新兵，包括翼鋒懷恩費沙及卡林威爾遜。升班馬方面有富咸、西布朗及令球迷期待已久嘅列斯聯，究竟佢哋能唔能夠喺英超站穩陣腳？聯賽長途戰，穩定最關鍵，每個週末都要坐定定睇波日子即將返嚟，球迷們，Are You Ready？