【體路專欄】今個星期相信各位球迷茶餘飯後都係討論緊曼聯後衛哈利麥佳亞使出嘅迷魂鎖係來自邊一個門派，利物浦中場法賓奴嘅12碼，究竟係咪真係12碼呢？視像助理裁判（VAR）再次成為眾人焦點，有啲情況VAR主球證認為冇問題就唔會叫主球證進行覆核，但事實上一而再再而三嘅事例證明，包括上周雲迪克受傷事件及今周哈利麥佳亞12碼，主球證的確需要利用覆核，不能單純倚賴VAR主球證，以減少場上出現兩位判決者，影響球賽公平性。
失色國家打吡戰 改朝換代難避免
講到呢度，大家都可能仲會諗緊嗰兩個波嘅判決啱唔啱？似乎大家好似遺忘咗今周西甲國家打吡戰El Clásico，最終皇家馬德里作客以3：1擊敗巴塞隆拿，施丹帶領球隊作客魯營球場出戰錄得3勝3和不敗成績，同時令皇馬喺史上對賽往績以97場超越巴塞隆拿（96）。過去嘅El Clásico星光熠熠，賽前討論話題大多數比較兩隊球員身價同人工，每位球星身懷咩嘢絕技，就算凌晨兩、三點先開波，都係當日最矚目之戰。
不過，隨着近年C朗拿度轉戰意甲，兩隊亦開始重整架構及改朝換代，尼馬、蘇亞雷斯、加利夫巴爾、占士洛迪古斯等巨星相繼離隊。對於巴塞隆拿來講，佢哋面臨失去美斯嘅問題，究竟球隊戰術係咪仲堅持以美斯為中心？我認為佢哋需要重新制定比賽風格，更需要對自家青訓球員給予肯定。對於皇家馬德里來講，佢哋所面對嘅問題較巴塞少，華拉尼、費達歷高華維迪及雲尼素斯絕對係球隊未來主力，嚟緊要做嘅係尋找沙治奧拉莫斯同賓斯馬接班人，當然最重要嘅係用成績證明佢哋仍然係世界頂尖球隊。
球員敵不過年齡，球隊敵不過改朝換代，作為球員必須要面對現實，究竟當刻自己能夠為球隊作出咩貢獻？可以為球隊帶嚟咩正面影響？清楚了解自己喺球隊嘅定位，能夠付出幾多，的確係每位球員無時無刻都需要考慮嘅問題！