【體路專欄】機會，我相信係人生最可遇不可求嘅事情。足球世界入面，機會除咗可能係效力心儀球會，夥拍偶像踢波之外，對球員來講更重要嘅係落場比賽。長江後浪推前浪，球隊每一年都會有新世代湧現，望遠啲例如巴塞隆拿翼鋒法迪、曼聯前鋒美臣格連活等 ，望近小小本地聯賽例如晉峰後衛馬文政、愉園後衛葉卓文及上星期以16歲273日打破東方龍獅史上最年輕出場紀錄嘅馬希偉（Timmy）。
小說話多做事 含羞答答的Timmy
第一次見到Timmy嘅印象係：「哇，呢個小朋友咁細粒，得唔得㗎？」之後練咗幾堂佢就返咗去葡萄牙。直到最近因為疫情關係，機緣巧合下佢升咗上一隊，再同佢一齊練波仍然係一個沉默寡言，練波好少會聽到佢把聲嘅小朋友，不過，今次唔同在佢已經無咁驚，放膽表現自己，享受每一課訓練。其實坦白講，如果我16歲有啲咁嘅機會，頭幾晚肯定瞓唔着，練波腳都震埋都似，哈哈。青年球員最需要係態度同勇氣，態度當然係勤力練習，做多唔做少；勇氣係面對批評嘅同時敢於展示自己優勢，嘗試將自己踢法融入球隊，並非單純踢交差波就算。諗返轉頭，如果自己份勇氣大多少少，放膽嘗試面對失誤，可能效果同進步又會多少少。
眼見越來越多青年球員浮現，好自然諗返起10年前自己同一班隊友初初出道，由必然降班膽慢慢變到中型班，再能夠贏得各項錦標及踢亞洲賽，呢段甜酸苦辣咩都試過嘅旅程，一定係畢生難忘。當然我哋嘅故事仲未完結，我一定會為將來繼續奮鬥，機會來臨嘅時候，就需要好好把握，錯過咗唔知幾時先再有下一次機會。雖然一分耕耘肯定唔會一分收穫，但係如果凡事都計過度過收穫先再付出，我深信距離成功只會更加遙遠。