【體路專訊】已抗癌多年的香港前甲組女子排球員劉韵琳昨日（9日）於社交平台發文，表示自己近月確診AML急性骨髓性白血病（俗稱血癌），但因目前仍未找到合適骨髓進行移植，故希望向公眾呼籲登記成為骨髓捐贈者，希望尋找到合適骨髓。
上季仍效力甲組南華的劉韵琳，在六年前確診患上CML慢性骨髓性白血病，一直以標靶藥控制病情，得以過著與常人無異的生活，仍可如常參與球隊訓練、與隊友一同健身練體能。惟至今年七月，病情起了變化，她因發燒需要入院，檢查結果發現白血球指數低（1.0），加上身體再次出現基因突變，劉韵琳確診為AML急性骨髓性白血病，並隨即開始接受化療，身體亦有出現發燒、作嘔等副作用。
以下為劉韵琳於社交平台的發文（節錄部分）：
「AML相對需要急切既（嘅）治療，所以月中我就開始打化療，辛唔辛苦？只可以話一個星期瘦10磅不是夢～長期作嘔，要食嘢先嘔左上一餐既（嘅）先，真係感覺到個胃底要翻出黎先開心，但重點係根本食唔到嘢，飲既（嘅）水都嘔曬出黎，根本都唔敢食。第一輪化療7日完成左，休息～第8、9日唔作嘔就開始精神，以為都唔係真係咁難頂。第10日朝早發燒39.2度，然後一直燒左7、8日，中性白血球低到0左，抽血檢查發現係有菌入血，即刻做左個小手術將喉仔拆左（喉仔用黎打藥、輸血同抽血，減少日日比針吉）。頭4日發燒真係好辛苦，全部都係39度以上，打冷震到我全身好攰但係完全停唔到唔震，一震就維持兩三個鐘，真係意志力既考驗！另外，依家只要少少流血都會好緊張，因為根本癒合唔到，隔兩日就輸一次血。今日先稍微好似有上升，中性白血球有0.3。現階段只求唔好感染😣」
View this post on Instagram
劉韵琳表示目前香港骨髓庫未有找到與她能配對的骨髓進行移植，希望呼籲更多人登記成為骨髓捐贈者，能夠幫助她及其他有需要的病者。她亦希望自己未來能成為物理治療師，幫助更多有需要的人。
如欲登記成為骨髓捐贈者，可瀏覽香港紅十字會輸血服務中心網站：
https://www5.ha.org.hk/rcbts/bm
