【體路專欄】「你今日找咗數未？」「你今日挑咗機未？」
最近大家嘅Facebook應該會被為「肌肉萎縮性側面硬化病」（ALS）患者籌款嘅Ice Bucket Challenge怒洗版，Ice Bucket Challenge活動主要係透過用冰水淋頭，希望各位為ALS患者籌款同關注有關病症。
筆者日前被好朋友Elsie tag咗玩Ice Bucket Challenge，人老咗，對Truth or Dare呢類遊戲卻步，所以選擇直接捐錢。除咗捐錢畀香港肌健協會有限公司外，同時亦捐錢畀幫助香港貧困小朋友嘅十分關愛基金會。
Ice Bucket Challenge風潮直捲全球，無論國家元首、億萬富翁（微軟創辦人Bill Gates、Facebook創辦人Mark Zuckerberg）、NBA球員（如Michael Jordan、Kobe Bryant、Stephen Curry、林書豪）、藝人（Lady Gaga、劉德華、周杰倫）都踴躍參與，從Marketing角度去睇，一定要大讚發起人嘅諗頭，令全球人士關注ALS患者，係一項非常了不起嘅成就。
但命運總愛同人開玩笑，活動發起人之一嘅Corey Griffin喺8月16日跳水出意外而身亡，當佢經歷最光輝嘅一刻時就要離開呢個世界，筆者感到好心痛同可惜。
講返Ice Bucket Challenge，成件事真係幾過癮，因為見到有唔少老友（特別係以前完全唔敢玩Truth or Dare嘅朋友）竟然夠膽對住鏡頭，不顧形象去找數同挑機，你知啦，女仔咁貪靚，成盤冰水倒落去，分分鐘妝到甩埋，真係要掌聲鼓勵！
一件事有好有壞，活動被人批評為趕潮流嘅玩意，又被人批評為浪費食水，而筆者留意到有一段時間，Ice Bucket Challenge的確一度成為「找數＋挑機」遊戲，甚少人提及關注ALS呢個問題，但後來傳媒指出問題後，後來參與嘅人士又淋冰又捐錢，成功令活動目標重回正軌。
為咗減低浪費水資源問題，好多人找數時發揮創意，例如老友梁梓禧喺節目《雙梁計》直播時淋冰水後，承諾當晚唔沖涼以抵銷用水份量，而前主播方健儀索性倒冰水時順便淋花，既可以做善事又環保，大讚！
香港人鐘意趕潮流唔係新鮮事，大家都唔係第一日住喺香港，反而透過今次活動再一次肯定，香港人仍然善心爆棚，捐款絕不手軟！希望各位無論對件事like又好、dislike又好，最緊要忠於自己，保持善心！