【體路專訊】北韓上月有金國香喺游泳世錦賽拎咗女子跳水十米高台金牌一鳴驚人，但唔講唔知，原來呢個「神秘國家」嘅水球隊都絕對唔惹少！北韓女子水球隊於今日展開嘅「亞太區水球賽」首場，更以13：0大炒香港女子B隊，令港隊教練趙錦文都話唔敢輕敵！
其實北韓今年已經係第二年參加今次賽事，上屆佢哋仲係女子組贏得季軍添。雖然佢哋之前一度受簽證問題纏繞，差啲嚟唔到香港比賽，但好彩最終都解決問題順利來港，今日首場仲贏得咁精彩，難怪上屆女子組得分王李宋琳（Ri Song Rim）接受訪問時都話好開心，並好多謝香港人留意到北韓水球隊。李宋琳又話今屆會努力幫北韓爭取冠軍：「受過嚴格訓練同講求團隊精神係我哋最大殺著，所以我好有信心今年北韓會拎到今屆冠軍。」
由於語言不通，小記需要錄音再自行翻譯。
北韓隊隊員受訪時態度親切，但相反教練對記者似乎就有啲抗拒，被問到對「香港嘅印象」、「覺得香港有咩好食」，北韓教練最後只係回答：「飲過大會安排嘅Vita Water （維他水），冇食過咩香港美食。」
明日香港女子主隊將面對住北韓隊呢個強敵，港隊教練趙錦文就話：「北韓隊服從性較強，打球時都好專注，而香港隊就相對靈活度高好多，可以即場改變唔同戰術。上屆同北韓隊打得都好辛苦，希望今屆打得冇咁肉緊，可以舒服啲。」
文：實習記者 吳宛容
【相關報導：亞太區水球賽港男女子隊先響頭炮】
圖：蘇子傑