上次富足主FFo左篇文，結果惹o黎劣評如潮，冇計，慧根o既o野唔係個個都有，今期唯有就一就，講番o的山係石頭海係水o既o野。
今個星期本地球圈最大件事，就係港隊亞洲盃力戰之下輸o左畀烏茲別克，出線機會變得非常渺茫。身為鍵盤戰士之一o既富足主，事後走訪網上幾個論壇，睇o下網民點睇，發現大家對「雖敗猶榮」呢幾隻字好有意見。冇錯，對於一o的平時睇開外國波o既人o黎講，港隊呢幾場表現真係麻麻。陳七射術唔及韋拿、嘉緯key波唔夠沙維、阿KIM亦唔似費爵爺咁可以呼風喚雨……基本上各方面都係唔合格，唯一可取o既就係鬥志。有人就拎番07年主場對烏茲別克場波o黎比較，證明港隊根本呢幾年都係原地踏步，根本唔應該再次滿足於「雖敗猶榮」。唉，鬼唔知阿媽係女人咩，但係當你見到一個一出世就跛手跛腳被父母拋棄o既孤兒，有一日竟然可以自己爬得起身，仲同正常人鬥跑，係跑到最後幾米先輸，咁除o左用雖敗猶榮之外，富足主實在諗唔到有其他形容詞。
講番夏體硬啦，我o地又何嘗唔係經歷過無數次雖敗猶榮，到上年先捧到記協盃？或者，我o地就係勝在冇閒錢，去請o的剩係識山係石頭海係水o既人做CEO吧！
富足主
