【體路專欄】最近喺Netflix睇咗一套關於安歷卡嘅紀錄片（安歷卡：全是誤解），內容主要提到佢自己過去足球生涯點點滴滴，20年間面對過好多唔同挑戰。總括而言，每分每刻盡自己最大努力交出表現，控制自己可以控制地方，具備強大心理質素面對壓力！唔經唔覺今季歐聯及歐霸踢到決賽，球員生理上要對抗疲勞，心理上亦要對抗壓力，歐洲冠軍誰屬，今個星期自有分曉！
國米挑戰西維爾 兩隊鬥攻無得輸
歐霸盃決賽由國際米蘭迎戰西維爾，兩隊復賽後整體表現穩定，殺入決賽非常合理。國米4強以5：0大勝蕯克達，前鋒盧卡古及馬天尼斯各自梅開二度，自2004 / 05球季阿祖安奴及馬田斯後，首次兩位前鋒單季分別攻入20球或以上。除此之外，盧卡古成為史上第1位歐霸比賽球員連續10場入波，暫時今季攻入33個入球，差1球就可以追平球會傳奇朗拿度紀錄。球隊一如以往慣用3人防線，高甸及迪維積擁有豐富經驗，維持意大利球隊防守緊密及極具紀律性特色。進攻方面，球隊除咗依靠盧卡古及馬天尼斯進行快速反擊之外，左右翼位迪岩布斯奧及艾殊利楊格經常能夠製造傳中球，所產生威力絕對不容忽視。
西維爾分別喺2006、2007、2014、2015及2016年問鼎歐霸冠軍，連同今屆成為史上首支6次踢入歐霸決賽球隊，因此，大部份球迷都會叫歐霸盃為「西維爾盃」。教練盧柏迪利今季上任後大大提升球隊場上表現穩定性，球員徹底融入及適應戰術體系，場上分工清晰，清楚知道自己需要負責嘅範圍及工作，現時各項賽事20場不敗，僅次於拜仁慕尼黑（29場）。球隊進攻上甚為立體及極具侵略性，除咗左右兩翼蘇素及奧甘保斯外，左右二閘域基朗及捷西斯拿華斯經常上前參與助攻，透過中場大腦班尼加透過長傳轉方向，大多數能夠喺邊路製造人多打人少優勢。
今場比賽勝負關鍵在於兩隊邊路攻守轉換效率，以及防守中場協助兩邊防務工作效率性。國米需要防範西維爾「雙翼齊飛」踢法；西維爾需要想辦法對付盧卡古及馬天尼斯正面衝擊。
巴黎突擊易偷雞 拜仁整體唔會曳
巴黎聖日耳門及拜仁慕尼黑將會上演歐洲王者對決，論近況兩隊不相伯仲，論實力拜仁略為秤先少少。不過，巴黎聖日耳門有效率及銳利嘅快速反擊將會成為今場贏波本錢。球會史上第1次殺入歐聯決賽，教練杜曹慣用4-3-3陣式，防線系統上泰亞高施華作為統領者，而馬昆奴斯近幾場移前出任防守中場位置，增加球隊中路攔截能力。不過，較可惜嘅係門將基羅拿華斯暫時仍然未知可唔可以趕及傷癒披甲，後備門將沙治奧域高需要隨時候命。進攻方面，尼馬、安巴比及迪馬利亞擁有好大自由度，基本上球隊冇特定中鋒，尼馬負責前場個人突破，安巴比專注以速度撕破對手防線，迪馬利亞作為中場同前線之間橋樑，為隊友鋪橋搭路。
拜仁慕尼黑可以話係現時歐洲狀態最好嘅球隊，過去29場錄得28勝1和驕人成績，一共攻入97個入球，平均每場3.34球，相當之得人驚！前鋒利雲杜夫斯基連續9場歐聯有波入，追平2003年曼聯前鋒雲尼斯達萊紀錄，今屆賽事暫時以15個入球高踞射手榜。拜仁有咁多個入波皆因佢哋有好多進攻點，前場目標有利雲度夫斯基同湯馬士梅拿，左右兩翼拿比及佩利鍚習慣內切移入中路，配合左右兩閘甘美治及阿方素戴維斯後上助攻，再加上中場哥列斯卡喜歡中路直搗皇龍殺入禁區，加加埋埋有7個進攻點！不過，凡事都有辣有唔辣，太過進取令後場未必有足夠防守保護，球隊大多數將艾簡達拿、謝路美保定及艾拿巴留守後場，但若然面對巴黎聖日耳門高速反擊，恐怕未能足夠應付。
踢法機動同簡單直接，擁有高效率攻守轉換係拜仁能夠控制比賽嘅關鍵。不過，唔好忘記巴黎聖日耳門擁有高速跑車安巴比、尼馬及迪馬利亞，隨時能夠透過突擊得手。預計呢場比賽巴黎聖日耳門會以穩守突擊踢法為主，雖然拜仁會有一定主導權，但肯定唔可以好似對上幾場比賽咁空群而出，令防守遺留太多被反擊空間。