【體路專欄】康文署噚日宣布由6月20日起全面重開免費戶外足球場，6月22日起重開收費草地足球場等運動設施，各位球迷真係等到草兒也謝了！除咗開球場之外，久違嘅英超噚晚都開波啦，一嚟就整場曼城大戰阿仙奴，最後由「師傅」哥迪奧拿帶領嘅曼城輕鬆以3：0擊敗由「徒弟」阿迪達領軍嘅阿仙奴，繼續保持喺利物浦之下、李斯特城之上，究竟今場比賽曼城點解贏得咁輕鬆呢？
精心部署鬥迫搶 幫波位置要緊張
單從上半場表現嚟睇，阿迪達顯然有備而來。阿仙奴球員開賽初段並無太大信心進行前場迫搶，直到中段先開始嘗試將防線移前，向曼城後防施加更大壓力，一瞬間令曼城球員未能適應，難以策動進攻。不過，如果要比較兩隊中前場逼搶，曼城今場顯然更輕鬆之餘，重顯得更加奏效，原因係隊友幫波位置及時間性有明顯分野。當大家後防同樣受壓情況下，曼城球員與球員之間距離比阿仙奴做得更為理想（可參考圖3、4、5），所謂適當距離，就係球員出現位置能夠牽制對手同時亦能成為傳球選擇。正正就係呢項細節，大大影響今場比賽雙方前場逼搶嘅效果。雖然雙方教練有類近理念，明顯地曼城球員係成熟地適應戰術，阿仙奴球員仍然尋找戰術當中嘅奧妙。
球員互動夠曬多 中路講求有突破
全場比賽曼城有多達20次射門機會，相反當阿仙奴只得3次而且無1次中目標，史端寧及加比爾捷西斯不斷在對手防線左右穿插，實在好難防範。撇除大衛路爾斯腦筋上嚴重失誤，阿仙奴今場面對最大嘅問題係唔能夠將個波運送到更危險嘅地帶。首先，中場上缺乏突破能力。根度斯及加列沙卡偏向穩陣為主，甚少喺中後場冒險盤球推進，反而具盤扭能力嘅施巴約斯同袓斯夫韋歷克掂波機會較少，大部門時間都唔能夠突破曼城中場線，令阿仙奴踼得十分被動。其次，唔能夠將奧巴美揚嘅速度運用到極致。奧巴美揚今場比賽苦無機會掂波，當球隊嘗試策動快速反擊，佢多次走到有利位置，但就得唔到應有供應（可參考下圖），變相難以對曼城後防產生巨大威脅，同時亦能夠解釋點解阿迪達會咁鍾意起用奥斯爾。
足球比賽就係講求避免犯錯，大衛路爾斯賽後坦白承認今場失波係自己嘅責任。不過，除咗呢樣之外，阿仙奴更加需要檢討過去三星期準備比賽嘅方法，加列沙卡及柏保路馬里受傷係最大警號，而冇咗奧斯爾嘅日子，球隊點樣製造入球機會？曼城方面，攻守上整體問題不大，但球員需要逐步提升狀態，希望受重創嘅艾歷加西亞能夠安然渡過危險難關。最後，今場比賽結論係前場逼搶、中路突破能力、隊友幫波位置及球員與球員之間互動，成為比賽中優勝劣敗嘅分野。