上期副足主下令唔准講可樂暉，唉，其實我唔講絕對無所謂，反而可樂暉應該諗下究竟幾時得罪左副足主啦。
剛剛星期日，唔少夏體硬成員去左修頓，出席體記 25 週年紀念賽，可能好多球迷一直都好疑惑，究竟夏體硬同體育記者協會代表隊有乜分別，其實簡單黎講，夏體硬相當於球會，體記代表隊等於國家隊，雖然好多隊友每一年收到我o既徵召令都感動到喊足三日劏雞還神，但查實佢地每一位，包括我在內，都會以代表體記出賽為榮，聽聞有部份人無入選體記大軍就傷心到失戀一樣，要去其他地方散心，可見夏體硬以及體記代表席位，同樣都是香餑餑。
講番場波，我地初賽擊敗香港小型足球總會，不過決賽就輸左比唔少港隊前輩壓陣既愉昇元老，雖然我地有丘建威、陳炳安同馮嘉奇助陣，不過呢隊愉昇元老陣中，有陳樹明、陳慶榮、黃福榮、梁能仁、林慶麟、陳志光、黎樹輝等等，個個威風不減當年，最終我地雨戰慘敗，只係得亞軍。
當晚，我同副足主以及幾個隊友食完飯之後去唱 K，有人話好羨慕某甲組球會班主，自己有間「紅色先生」，可以比隊友消遣娛樂，唏，人家可是百年歷史既老牌球會哦呵，我地成軍幾年，已經有咁強勁既 noise，我諗我地唔需要等百年、百年之後亦唔會只得一間屬球會人士o既 K 場咁少，我敢向大家承諾，夏體硬一百週年之日，就係我地上市大搞之時！
國足主