【體路專訊】太陽國際體育會上星期榮獲清遠市旅遊局邀請，到國內參加第一屆「清遠足球文化節」，期間更與恒大足球學校互相交流，獲益良多。
由於機會難逢，太陽國際體育會今次共派出U13及U11兩隊青年軍北上，由副主席楊素梅女士、總監陳志康、青訓經理丘建威及一眾教練領軍。今次行程一連三天，首日在主辦單位安排下到擁有50個球場的恒大足球學校參觀。U11主教練鄧紹賢坦言大開眼界：「今次令我哋見識到中國足球嘅強大，球會肯投放資源，容許小朋友從小就接受訓練。引證到中國足球體系開始成熟，相信未來一定大有前途。」
旅程第二日是出戰「清遠盃青少年足球邀請賽」。不過由於同齡球隊出外集訓，恒大足校派出03年出生球員上陣，結果實力及體型有明顯分野之下，主隊大勝8：0捧盃。其後一場U11比賽恒大亦以3比0勝出。
雖然兩仗都強弱懸殊，但皇家馬德里青訓出身、現任恒大足校技術總監費爾南多仍對太陽國際有正面評價，他透過國內翻譯表示：「恒大U13剛贏咗全國冠軍，有4人入選國家隊，實力本來就超班，加上你哋球員年齡較少，競賽水平已不一樣，但我見到大家喺種種不利情況下，仍很努力比賽，態度十分正確，而且我對你哋守門員（龐焯熙Bear）更有深刻印象，佢多次勇敢封阻，成功救出唔少險球，只要繼續努力，相信將來會有更好表現！」費爾南多賽後更特別走去安慰Bear，勉勵他毋須太在意戰果。
太陽國際U13主帥高俊聞言後亦表示：「Bear本身雖然貪玩，但比賽十分認真，一球都唔想輸，好集中。透過今次比賽，我哋體會到恒大壓逼有幾快，對備戰嚟緊對港會及屯門嘅聯賽有好大幫助。」
資料來源：太陽國際