【體路專訊】「全港學界精英足球比賽」明日將舉行四強大戰，今年躋身最後階段嘅四支勁旅除了仁濟醫院董之英紀念中學、香港加拿大國際學校同拔萃男書院之外，亦有睽違十年再闖精英賽四強嘅西島中學，而兩場戲碼就分別係兩間國際學校對兩間傳統華人學界勁旅。
四強頭場由衛冕的董之英迎戰西島中學，董之英今年繼續由前香港足球先生高尼路執教，短傳進攻踢法華而實，加上出色的防守力，為該隊贏得「學界巴塞」嘅美喻。至於對手西島中學今年表現同樣令人驚喜，兩場比賽誇張地取得14個入球，主力Alex JoJo個人就以8個入球高倨射手榜，董之英後防將受到一定挑戰，同時這位高效率射手能否撕破對手防線亦成為今場焦點。
另一場四強比賽就由男拔同加拿大國際合演上屆季軍戰「翻版」。男拔上年以1：3不敵對手，今年提早於四強相遇，兩隊嘅陣容亦有不少變化。今年男拔勢頭比上年更強，兩場比賽錄得11入球、0失球，攻力相當強勁，功臣之一必數隊長孫銘謙。不過加拿大國際亦不容小覷，晉級路上先後踢走另外兩隊實力強橫的國際學校。今場焦點將在男拔能否報卻上屆一敗之仇，或再次向對手加拿大國際俯首稱臣。
四強戲碼已夠緊湊，3月3日的決賽自然成為今屆學界期待已久的賽事。《體路》將於3月3日聯同《雅虎香港》破天荒首次直播「全港學界精英足球比賽」，為大家送上呢場學界最強之戰，屆時將有專業評述團邢安邦、梁冠聰及曾紹達隊與大家一起直擊決賽！密切留意！
決賽資訊
日期：2017年3月3日（五）
時間：10:30 a.m.－12p.m.