【體路專欄】業餘籃球聯賽開得成行成市，帶起籃球熱潮的同時，也讓不少年輕人實現創業夢，一舉兩得。
不過凡事兩面睇，現時一般人除非願意食炒價，否則在平日根本難以book場，只有在假日日子，例如聖誕節、復活節、清明節才可以成功book場（受惠於業餘籃球聯賽休息）。
即使成功book場，你都要求神拜佛隊友的女友/老婆願意放人，不要小看太座的威力，試過有隊友射入buzzer beater後，立即走人返歸陪老婆。而且當你滿心歡喜book到場嘅時候，你會發現湊夠十個人開波原來並唔容易。
開波前
「吓？乜book到咁遠呀？大角咀體育館？我地成班人住港島㗎！」
（鬼唔知你地住港島咩？我夠住新界，遠又遠過你，車費又貴過你，都未出聲）我心諗。
開波後
明明講明book場時間是下午三點至五點，大家都知道搭正要交場，不過總有人卻偏要遲到起碼20分鐘才到場。
（當然，若因為工作原因，或事完張揚未能準時的朋友不在譴責名單中）
開始時頭15分鐘，往往只有6至8個人，唯有半場三打三，或全場四打四頂住檔，一邊打一邊等戰友來臨。
好不容易湊夠十個人打五打五，那時候已過了20分鐘，第11名至13名朋友開始到場。最莫名奇妙的是，他們不是先做熱身動作，而是在進攻轉換的時候，走入場內射波熱身。最誇張的一次，是三個人射三個波，仲要射三分。
筆者一直認為此舉是相當無禮貌及影響球賽進度的表現。試想想，當攻守再度轉換的時候，進攻那一方發現有人射波，還應該發動快攻嗎？如果進攻那一方眼大睇過籠，看不見有「外人」在場，快攻不小心撞到走避不及的外人，又會否提高受傷風險？
遲到的朋友，理論上想盡快參加比賽，但你們不斷走入場內射波，導致其中一隊不可以快攻得分，又是否自相矛盾？
打波好睇心態，如果主要想聯宜hea打無可厚非，不過筆者真的不欣賞 遲到無通知，兼亂入射波搞亂比賽的朋友，真的要好好調整心態了。