【體路專訊】港超聯球季已近尾聲，目前排聯賽榜第3位的冠忠南區，已著手為來季部署，主席陳文俊更向球迷大派定心丸：「球隊9成9人腳會留隊，實力一定不會差過今季！」
冠忠南區副主席黃焯添上周六大婚，除了球會全體職、球員之外，亦有其他港超友會教練及球員列席。陳文俊向傳媒透露組軍進展：「教練鄭兆聰一定唔會走，球員就9成9都會留效，續約都會加人工！比圖及蘇沙已續約，馬高斯本身簽咗年半⋯⋯只差基奧仲傾緊，其他外援都會逐步傾，相信唔會變太多，就算有都係一個起兩個止，睇教練需要，總之可以保證，一定唔會差過今季！」問及會否有本地球員加盟，他面有難色：「香港有幾多華人？好嘅都已經畀人簽咗，而且我哋又冇能力畀高價。」
與一些「無上限」班費球會相比，南區一向作風務實，陳文俊坦言，來季不會特別提高支出預算：「我哋季初同贊助商簽咗5季，大家有共識，每季班費唔會超過1000萬，唔想加重贊助商負擔；當然如果有需要的話，球會都會加碼，就好似今季簽入內田智也咁。」南區餘下球季除了足總盃準決賽（對傑志）及聯賽煞科戰（對香港飛馬），還要應付季後附加賽，但他承認球會目前未有能力參戰亞冠：「自己知自己事，亞冠距離差太遠。當然我哋無論咩比賽都會盡力打，但如果相比之下，我最想就係拎聯賽第3，畢竟南區喺頂級聯賽從未試過，而且分畀球員嘅獎金都會豐富啲！」
文：文森特