季前紐約人同網隊大肆招兵買馬，加上羅斯復出振興公牛軍心，令好多球迷（包括我）寄望東岸五虎有力同西岸九雄決一死戰。（以九雄呢個詞語並非玩粗口諧音，而係過去幾年西岸第九名嘅常規賽成績，往往可以排喺東岸前五）。
但勢估唔到，今年東岸球隊成績差到令人跌破眼鏡，除一哥溜馬（18勝3負）同二哥熱火（16勝5負）撐住場面外，竟然只有鷹隊命中率過五成，排第四竟然係季前大換血嘅塞爾特人（10勝12負），三虎去咗邊？
先講公牛，季前筆者已經喺台灣《美國職籃》同《體路》講過，非常擔心D Rose會步身型、打法相近嘅Steve Francis後塵，受傷後由一個明星球員變為二打六。頭十場比賽，D Rose得分同助攻大跌至15.9分＋4.3次助攻，命中率跌破四成，最不幸係，Rose面對拓荒者時右腳膝頭受傷，再次提早向支持佢嘅球迷講拜拜。
呢一下重傷，除咗有機令D Rose面對提早退休嘅危機外，亦可能斷送公牛復辟嘅希望，繼而令熱火或未來三至五年壟斷東岸（前題是LBJ留喺熱火）。
原本以為網隊同紐約人會拼老命爭奪紐約一哥，結果兩隊竟然「爛鬥爛」，分別以6勝14負同5勝14負掛尾二同尾三。
網隊死因並非老將KG同Paul Pierce唔上力同嚴重傷兵問題咁簡單（D Will上陣率不足一半、Andrei Kirilenko至今上陣四場），最致命因素係教練Jason Kidd至今仍未能展示點石成金嘅能力，但已經大玩攻心計！以往有「教練殺手」之稱嘅Jason Kidd，轉任教練仍然不改「遇教練殺教練」嘅本色，趕走同佢不和嘅防守教練Lawrence Frank，試問咁樣球隊又點樣重回正軌？
紐約人喺防守主力Chandler欠缺15場比賽下，紐約人防守效率跌至每100次攻防下被攻入107.1分，排喺聯盟尾五。球隊再次貼上昔日「土豪」品牌，年薪2,000萬嘅Amare Stoudemire「貢獻」5.4分同2.9球籃板、Metta World Peace真係好「和平」，每場出嚟浪射三分無晒火、神經刀JR Smith同彈跳人Iman Shumpert走晒樣，試問點樣羸波？安東尼數據靚到好似頂級中鋒(25.2分＋9.7球籃板），但再係球霸上身，紐約人真係係咁先。
假設西岸第十一名至第十三名球隊嘅成績比東岸第八更好嘅情況維持至季尾，就會出現殺入最後16強嘅球隊並非聯盟最強嘅怪現象。
2007/08球季，前一季以黑八種子揮低小牛嘅勇士隊，第二年常規賽成績上升至48勝34負，呢個成績喺西岸竟然入唔到前八，但卻比東岸四哥、有LBJ在陣嘅騎士隊（45勝37負）更好。結果，本來預計有三至四年光輝期嘅勇士隊無奈地提早進入重建期，但又畀佢地意外地喺兩年後（2009/10球季）得到重建主力－Stephen Curry，所以究竟是福是禍真係難以評論。