【體路專欄】周四紐約人雙加時作客107：101擊敗公鹿一役，前者嘅Andrea Bargnani係OT1、球隊領先94：92、比賽時間不足24秒嘅情況下，堅定不移咁射出一記弧線極為漂亮嘅3分波，令人拍案叫絕。
可惜「噹」一聲，籃球撞框而出，紐約人未能將比數拉開至97：92。搶得籃板球後，公鹿立即叫暫停，並由John Henson完成補籃，追平94：94，將比賽拖入OT2。
雖然紐約人最終係OT2憑Anthony「顏射」三分奠定勝局，險勝107：101，但亦都不得不佩服Bargnani嘅苦心－為球迷帶來一場高潮迭起、新奇有趣嘅比賽。
片段網址：
OK，其實阿言並唔相信Bargnani有咁嘅初衷，畢竟佢係同Kwame Brown、Anthony Bennett共享「近代水貨狀元」之稱嘅一名傻仔(咁啱三人都係B字頭？)，要佢察覺到籃底空晒嘅A米已經唔易，要佢係上述情況之下醒起要「hold住個籃球、等對手犯規、射罰球、嬴比賽」，似乎有啲強人所難。不過，一班隊友就冇阿言咁體諒Bargnani喇，你睇佢地嘅動作就知。
要射，都要射得安全，領先緊10分，你刷下數據我唔怪你，但咁嘅情況下射，就係智商堪憂嘅表現。
Bargnani後來解說，話佢想打得有侵略性啲，所以當時諗都冇諗就射左個波。紐約人今年戰績慘不忍睹，其中一個問題就係只得Anthony一個得分點，隊友一到緊張時間就淨係識食花生，比個波佢單打，由佢比人double team，Bargnani肯企出黎分擔重任，其實係未嘗唔係一件好事。所以學Chandler話齋，今次係一次好好嘅經歷，起碼教練Woodson應該知道，下次有咁嘅情況，佢要叫個暫停提醒球員「醒少少」。