【體路專欄】一連三星期我介紹咗中堅、左右二閘及防守中場喺球場上類別同特性，以上位置都係偏向防守，今集開始我就會講吓進攻球員。常言道，進攻就係最佳防守，進攻球員大部份時間能夠決定比賽勝負，能夠扭轉局勢，改變球賽命運。今集主角進攻中場好多時候被譽為球隊靈魂人物，即係著起10號波衫嘅球員，佢哋係球隊命脈，掌控進攻層面一切，其他周邊球員以佢為核心，聽從指令發動進攻。
創造型 — 大衛施華、奧斯爾
小朋友世界，所有事情都係美好，以為自己可以好似小鳥自由自在地翱翔，以為天馬真係可以行空。幻想同想像力的確好重要，皆因下一步就係創造，足球世界入面嘅創造，大概係指球員能夠出其不意地做出唔同基本動作，例如傳波、控波及射門，以最「估你唔到」嘅方式征服敵人。創造型進攻中場正是如此，根據個人閱讀球賽能力，喺適當時候準確地傳送，令後衛難以防範。球員特性需要非常了解自己傳波力量及質素，因應敵人位置及距離，從而判斷個波能唔能夠順利抵達目的地。睇到傳唔到，或者傳到睇唔到，真係少一樣都唔掂，而普遍創造型中場最大弱點係防守及對抗能力較低。
突破型 — 迪巴拿、基利殊
創造型中場負責「派牌」為隊友鋪橋搭路，猶如一個輔助角色。相反，突破型進攻中場多以自我為中心，單憑一幾之力喺中路突破，從而為球隊喺進攻危險地帶製造人數優勢，甚至喺禁區附近搏得罰球。球員個性擁有較強單對單盤扭能力，經常喺敵人防守線及中場線之間遊走，務求有波到腳後轉身直接攻擊防線。不過，要成為出色突破型進攻中場關鍵在於識得「背身」踢波，攞波前要清楚四周環境，例如敵人與自己距離、可選擇傳波目標及盤扭方向。其次，球員需要具備耐性，耐心喺中堅及防守中場之間逗留，一但耐性不足墮後至中場參與組織，就不符合突破型進攻中場職責。當然，過多盤扭或會拖慢球隊進攻節奏，若球員長時間喺比賽過程中無波到腳，或會失去比賽狀態及集中力。
後上入楔型 — 迪利阿里、曼治
後上入楔型進攻中場又稱為偽前鋒或後上前鋒，球員場上出現位置同突破型相若，唯一最大分別係勇於向前走動，嘗試貫穿敵方防線。現代足球較為著重球員與球員之間互動及無球跑動（Off Ball Movement）， 後上入楔型進攻中場大多數同前鋒進行位置互換，利用「一出一入」位置轉移令後衛及中場球員產生誤會或錯配，短時間內得到進攻優勢。球員特質需要拿捏後上入楔時機，太早或太遲會造成好大反差。此外，球員本質擁有不俗埋門能力，亦有射手觸角嘅味道。由於需要經常跑動後上入楔，若然齋跑又攞唔到波，或會令球員感到心灰意冷，放棄跑動。因此，球員過於懶惰及容易放棄，難以勝任後上入楔型進攻中場。
進攻完美型 — 迪布尼、古天奴
話明完美型，就梗係集合天下武器於一身，既能夠為隊友鋪橋搭路，亦能單憑自己能力製造入球機會。如果有睇上幾集嘅讀者，就會發現其實要成為完美型關鍵，就係決定性、穩定性及時間性。適當時候做適當工作，適當時候擔任適當角色，面對場上突如其來變化仍然能夠處變不驚，揮洒自如地表現應有水準。不論單對單個人盤扭、為隊友製造致命傳送及具備入球能力，球員本質相當全面。不過，要成為進攻中場完美型，更要符合死球專家特點，能夠為球隊處理各項死球，提供高質素傳送及入球。
沒有球員係完美，每個球員總會有自己強弱之處，適當地展示自己最強一面，適當地埋藏自己最弱一面，亦係一門高深學問。進攻球員比防守球員較困難重拾及保持狀態，皆因涉及較多步法移動、球感及主被動分別。場上表現總會有起有跌，即使跌低，亦要勇敢面對，盡快調整心理，迎接下一個挑戰。