【體路專欄】上星期母親節，大家點樣同媽咪慶祝呢？定係備受外圍因素影響，難以慶祝？好多時候，我哋都要顧及身邊環境，四周圍隨時有事發生，敵人更可能四面八方一擁而上，情況就好似球場上中場一樣，一眼要關七，隨時迎接身邊任何挑戰。過去中場球員大概只會劃分進攻或防守，隨着時代進步，我哋所有嘢都要講求效率，令到中場球員分工上更清晰，但如此同時增加咗場上要兼顧任務，對球員能力要求有增無減，攻守兼備已經係最低要求。
中場：沙維
如果之前有睇【同一位置類型多 究竟你會學邊個——防守中場篇】嘅讀者就會知道防守中場有咩類型可以演繹，喺過去年代，防守中場最主要任務係攔截，淨係會諗住點樣搶波，其他場上工作並唔會太理會。不過，隨着沙維出現，具備極強傳波及控波能力，幾乎係防中嘅象徵。沙維基本上每場比賽傳球成功率達到90%或以上，經常利用出眾傳控球技術將嗰波喺困局之中轉化成進攻機會，加上出色護波及閱讀球賽能力，造就佢成為防線及前鋒線橋樑。正因如此，沙維為防守中場配上新定義，由集中防務工作演變成策動者，成為球隊攻守命脈。
．如此優雅秀麗輕易地避開對手，實在令人嘆為觀止。（Photo Credit: allas FCB Youtube Channel）
中場大腦 以佢為首
將防守角色加入進攻概念，可以話係非常前衛諗法，但諗深一層，沙維並無排除防守中場需要防守概念，只不過用另一個形式表達。由過去注重身體對抗性，埋身肉搏搶波，沙維透過聯繫身邊隊友，以最有效及節省體力方法進行逼搶，令球隊踢法變得更具團隊性，每位球員都需要分擔進攻同防守責任，單單能夠控制球隊攻守節奏，足以令防中變得更有價值。此外，沙維「獨具慧眼」Killer Pass技驚四座，好多時候能夠做出完美助攻傳送，我以為係能人所不能，種種因素結合一齊，足以令佢說服我成為最具影響性中場。
．由中後場移到中前場發動迫搶，正正係沙維對防中喺防務工作上作出嘅改變。｛Photo Credit: adinoosm Youtube Channel）
．呢個情況喺遊戲世界要畫一條線做傳波好容易，但係真實要做得到絕非易事。（Photo Credit: Light House Youtube Channel）
沙維曾經講過：「足球係一個頭腦比賽，講求時間同空間轉換，利用最短時間，將個波運送到最有優勢地方。」的而且確，佢改變左世人對防守中場嘅定義，成為好多球員學習對象及目標，除咗球員自身技術、身體對抗性、心理質素等基本要求需要訓練外，思考訓練同為重要，腦海中必須多加模擬自己場上經常對應情況，從而更容易搵到最佳解決辦法，沙維用行動證明咗「用腦去踢波」係幾咁重要！