【體路專欄】人與人相處係一種好深奧嘅學問，有時候，一瞬間我以為或者一瞬間你以為，一瞬間我覺得或者一瞬間你覺得，足以產生好大誤會，對外人嚟講更加係難以明白。容易令人誤會嘅普巴噚晚終於出場，令一班等咗好耐嘅魔迷終於可以見到佢同般奴費蘭迪斯合作，結果呢對「P.B.組合」輕鬆帶領球隊以3：0擊敗錫菲聯，繼續向第4位車路士步步進迫。
早前大部份球迷都談論究竟P.B.組合會係點擺放，領隊蘇斯克查曾經講過會將般奴費蘭迪斯放喺8號位置（Box-To-Box中場），普巴會放喺較前嘅進攻中場，不過，原來佢係呃人，實情係2個掉轉先真（可參考圖3）。單從噚晚比賽表現嚟睇，普巴專注成為馬迪及般奴費蘭迪斯橋樑，大部份時間出現喺兩者之間（可參考圖4）。當球隊嘗時從後場開始組織嘅時候，馬迪會墮後到2位中堅之間，普巴會因應對手位置喺適當地方出現，成為後場首個傳球目標。與此同時，般奴費蘭迪斯就會較有耐性地喺中前場「旮旯位」等候，令球隊組織上更具立體性。
除咗有波再腳組織時候分工清晰之外，普巴同般奴費蘭迪斯無波在腳嘅情況下，同樣有各自防守區域及目標，不論進攻同防守，整體效果非常理想。當曼聯嘗試進行前場逼搶嘅時候，般奴費蘭迪斯主動地靠近對方防守中場，普巴會向前捕捉另一名中場球員，馬迪就會留守較後位置應付對方進攻中場（可參考圖5）。喺另一個情況，當對手嘗試將嗰波左右轉移轉方向，普巴同馬迪會以雙防中姿態出現，一左一右，楚河漢界地每人照顧一邊，支援及包抄閘位或中堅隊友（可參考圖6），對防線進行完美保護。
陣式同戰術，往往都只係紙上談兵，而真正決定部署成唔成功，取決於球員場上紀律同執行性。曼聯過去一直以普巴為中心建立球隊，但佢喺場上過於「自由自在」地做自己想做嘅事情，反而對球隊產生反效果。如今普巴睇嚟大個仔啦，希望佢能夠明白球隊永遠大過球員嘅道理，適當時候要犧牲自己，適當時候要挺身而出，帶領球隊更進一步。