【體路專欄】距離今季英超落幕仲有3場比賽，早前榜尾諾域治以0：4大敗俾韋斯咸後，成為今季首隊降班嘅同時，第5次英超降班亦係歷史上最多次數嘅球隊。至於喺降班區域嘅般尼茅夫同阿士東維拉情況仍然非常危險，除咗靠自己之餘，仲要寄望韋斯咸同屈福特失分。另外，爭逐來季歐聯席位嘅車路士、李斯特城及曼聯早前同樣失分，搞到前4形勢可以話七國咁亂！
狀態無起色 防守成致命
一隊進攻出色嘅球隊，能夠贏到一場比賽；一隊防守出色嘅球隊，能夠贏到一個冠軍。今季英超最尾3隊都係失波最多，諾域治失68球、阿士東維拉失65球、般尼茅夫失62球，數據直接反映事實，唔能夠解決防守問題係最大致命傷。撇除球員質素以外，防線整體合作性、球員互相補位及包抄意識、對應邊路傳中波能力、集中度等等全部都有好大改善空間。不過，如果一講失波就矛頭直指防線同守門員嘅話，未免太唔公平。其實，中前場球員遮線、對波、對位、以致阻止對方踢快速反擊都係一種防守貢獻，今季諾域治、阿士東維拉同般尼茅夫中前場欠缺緊密度，令前中後三線唔可以保持適當距離，難以協助隊友製造人多打人少防守區域。當所有情況都同其他隊差小小，加加埋埋就係差好多，因此，絕對唔可以忽視場上每一個細節。
車仔形勢較佔優 絕對不能靠對手
自己嘅事，自己做返，永遠都唔好假手於人。嚟到季尾爭逐下屆歐聯資格非常激烈，車路士（64分）、李斯特城（59分）同曼聯（59分）爭2個位置，車路士啱啱贏咗諾域治稍微佔上風，李斯特城同曼聯會喺最後一場比賽對碰就最為關鍵！論3支球隊近況各有千秋，車路士實而不華同穩中求勝踢法較為被動，每場都係「魚生粥，緊緊熟」嘅味道，餘下兩場比賽要面對浪隊同利物浦，至少要贏一場先可以確保歐聯資格；李斯特城復賽之後表現慘不忍睹，踢咗6場贏得1場，搞到現時形勢非常狼狽，之後仲要硬撼錫菲聯、熱刺同曼聯，情況最為令人擔心；曼聯累計各項賽事19場不敗，但早前被修咸頓尾段逼和錯失升上第3位機會。領隊蘇斯克查連續五場派出同一正選出戰，征戰頻密下明顯見到球員有疲態，嚟緊將會面對水晶宮、韋斯咸同李斯特城，蘇B真係要諗下計仔點樣作出輪換而有好成績。
姑勿論最終成績同排名如何，今年每支球隊同每個球員都面對前所未見嘅困難，球隊要處理營運問題，球員要面對狀態問題，即使將來仍會面對重重難關，我深信我哋一定能夠迎難而上，就算場波幾難踢，就算場波係逆境波，都一定要踢落去！