【體路專欄】苦等30年，利物浦尋晚終於捧起英超冠軍！正所謂萬事起頭難，領隊高普用咗幾年建立紅軍新王朝，呢兩季可以話係修成正果，球隊除咗建立既定踢法、展示新風格同理念之外，球迷由懷疑球隊變相信球隊，對外營造到令對手感到強烈壓迫感，輸少當贏已經係一個理想戰果，呢種威力絕對唔係一時三刻可以建成。
高普魅力沒法擋 球員踢得更加放
講到利物浦能夠寫下歷史，高普一定係居功至偉！自2015年加盟後，開心嘅笑容不斷為球隊帶來正能量之餘，同時由內至外改變球隊風氣。軟件部份搞掂，到硬件部份高普亦為球隊帶來最務實需要，過去幾年間簽入阿里遜、雲迪克、羅拔臣、法賓奴、沙拿及沙迪奧文尼等重心球員，對症下藥地增強實力，為球隊奠下奪冠重要基礎。此外，高普自身嘅激情同爭勝力毫無保留地影響球員，場上從來都唔會見到偷懶嘅球員，每場比賽都帶着堅定不移嘅爭勝心，絕不退縮同畏懼嘅精神。即使個別球員失誤導致比賽失利，從不公開責備及指罵，令球員只會更甘願為高普博命！
長遠靠青訓 成功攞滿分
英超同歐聯冠軍經已到手，對利物浦來講下一步或者下一個目標係咩呢？答案當然係要持續地成功發展！更好嘅球員都會有退休同下滑嘅一日，培育青訓球員銜接球隊未來係最好不過嘅做法，若然部份位置未能夠適當地由青年球員接棒，亦可以針對性地收購個別位置。紅軍已經制定咗最好藍圖，球隊以4-3-3陣式應戰，左右兩閘需要具備極高頻率助攻助守；中場一字排開，正中間防守中場主要負責平衡球隊及左右包抄，左右中場集多功能於一身，作為Box-To-Box踢法需要攻守兼備；前鋒左右兩翼係球隊進攻命脈，需要具備超強突破能力，反而由費明奴出任正中鋒嘅「偽前鋒」踢法較難尋找合適接班人，睇嚟高普都要諗定PlanB。
成功永遠要經過無數失敗，高普用咗5年時間帶領利物浦征服足球世界，當中遇過無數難關同障礙，無數高低起伏，佢哋都堅定不屈，從不低頭，從不畏懼，絕對值得學習同借鏡。唔知喺你生命入邊有無一刻諗過放棄，如果有嘅話，不妨諗吓利物浦振奮人心嘅激勵故事，YOU’LL NEVER WALK ALONE！