【體路專欄】上周末英格蘭足總盃決賽上演倫敦打吡戰，最終阿仙奴憑奧巴美揚梅開二度反勝車路士，奪得足總盃冠軍之餘，更取得直入下屆歐霸盃分組賽資格。激戰過後，係時候要需要檢討一下今季表現，對於贏波嘅阿仙奴，係咪真係冇地方可以再改善？對於輸波嘅車路士，點解會被睇高一線情況之下輸波？
阿記防線要穩陣 防守集中要留神
講到阿仙奴第一樣要改善地方，必定係防線上穩健度。球隊對上7場比賽只得1場無失波，雖然中堅嘅大衛雷斯、梅斯達菲及柏巴斯達普路斯擁有一定實戰經驗，但卻缺乏具經驗球員應有嘅穩定性。防線整季表現時好時壞，聯賽以第8名完成，同時亦先後擊敗曼城同車路士奪得足總盃冠軍，證明球隊「發揮正常」嘅時候有一定實力。閘位有迪欣尼、比爾連、蕯卡及美倫賴奧斯，基本上未來幾年都唔需要搵新球員代替。今夏轉會市場務必尋找一名可依賴中堅球員，提升防線穩定性及集中度。
Auba成進攻核心 快速突破最醒神
自從阿迪達上任後，球隊進攻層面變得更多元化，再唔係單單等待入球機會，而係能夠創造機會。加列沙卡與施巴約斯配搭效果越來越鮮明，前者主要負責保持球隊攻守平衡，堵塞後半場漏動；後者係前者掩護下有更多活動空間參與同發動進攻。球隊進攻戰術上最大改變莫過於奧巴美揚嘅活動空間，喺阿迪達悉心部署下，好多時候會安排蕯卡或美倫賴奥斯兼任左翼位及左中場，令奧巴美揚可以有咗中場移到中鋒位置，聯同拉卡錫迪合作攻堅，同時解決咗佢哋唔能夠並存嘅問題。
車仔防守唔細心 球員對待要認真
高水平足球比賽講求減少自己犯錯，把握對方犯錯。車路士今季後防真係周不時都會犯下錯誤，令球隊喺比賽中失利，關鍵點係球員做得唔夠仔細。領隊林柏特今季好多時候都會以基斯甸臣、蘇馬及魯迪加排出3中堅陣式，不過，由於3名球員單對單能力並不是特別出眾，加上欠缺速度，好多時候難以覆蓋所需要防守範圍，個人認為可以嘗試域斯占士及艾斯比利古達出任左右中堅，改善防線間位置感及提升互補能力。
前線三叉戟 倫敦變藍色
藍戰士今季第4名完成英超賽事，屬於所有倫敦球會之中最高排名，暫時林柏特已經買入射手添姆雲拿同翼鋒施耶治，加埋艾巴咸或基奧特，下季攻擊力有增無減！隨着今季主力韋利安大有機會離隊，整體進攻架構要重新思量，進攻選擇上添姆雲拿可勝任正前鋒及翼鋒，施耶治可踢左右兩翼，加上曼治預料繼續成為球隊核心，佢嘅後上入楔同竄擾能力，絕對可以改變球賽困局。因此，4-2-3-1陣式會較為適合，佐真奴、干堤及哥華傑治可輪流出任中場中位置。
場上進攻同防守都需要作出協調之外，當然，唔少得場外兩位領隊臨場調兵遣將，單以今季表現嚟睇，呢方面能力阿迪達喺林柏特之上。如果單計幾場比賽精心部署及職場調動，阿迪達會較為優勝；相反，如果以一整季表現嚟睇，林柏特表現會較為穩定。不過，不得不提嘅係，林柏特季初同季中都唔能夠買球員，能夠取得下季歐聯資格席位同打入足總盃決賽，已經係一張好理想嘅成績表，即管睇吓兩支倫敦球會夏季嘅表現會係如何。