【體路專欄】歐聯經過425日之後，拜仁慕尼黑喺79支球隊中脫穎而出，成功登上歐洲之癲，自1974、75、76、2001及2013年後，史上第6次奪得歐聯冠軍！史上第1支球隊以全勝姿態奪冠！今屆歐聯11場轟入43球係歐聯史上第2多，僅次於1999/00年巴塞隆拿所創下記錄嘅45球紀錄，但當時巴塞一共踼咗16場比賽！的而且確，復賽後嘅拜仁狀態大勇，每場比賽不論數據或比數都係遠勝對手，可以話贏得相當合理，實至名歸！究竟，拜仁點解贏得合理，贏係咩地方？
主動出擊做防守 高位壓迫無亂走
好多時候我哋以為防守工作係由後防線開始，不過，自從巴塞隆拿踢出高壓位逼搶及「六秒反搶法則」戰術之後，基本上可以好肯定防守係由前場開始。戰術成唔成功關鍵點喺球員紀律性、執行性及體力負荷，細節上講求球員對波、遮線、對位等時間性及跑動路徑，只要一個球員有毫厘之差嘅錯誤，足以摧毁整個迫搶。
拜仁整個淘汰賽階段同樣採用高壓位逼搶，基本上4人防線企近半場位置先發制人（可參考圖3），預其俾機會對手製造進攻同起腳機會，倒不如杜絕對方製造機會。當然，呢個踢法最危險嘅地方係防線後面有好多被反擊空間，但球隊勝在有一班好肯防守嘅前鋒，利雲杜夫斯基、湯馬士梅拿、拿比、京士利高文等等進攻球員，不斷保持前場壓迫張力（圖4），令對手冇咁容易喺後場開始組織，從而減輕防線壓力。
進攻選擇夠晒多 每場好鬼易入波
防守做得好之後就要睇吓點製造入波機會，球隊踢法簡單直接，主要利用兩側出擊，以「雙閘齊飛」踢法經常喺邊路製造人多打人少進攻優勢，而入波多嘅關鍵就係每次埋門都有好多進攻點（可參考圖5及圖6）！拜仁今季各項賽事合共攻入159球，每當佢哋有進攻機會嘅時候，前鋒利雲度夫斯基及湯馬士梅拿必然會喺禁區入面出現，加上後上中場哥列斯卡及左右兩翼，每次禁區入面至少有3-4個進攻點，換句講法，即係話至少有3-4個入波機會。正正因為咁，拜仁往往得到壓倒性優勢，攻勢一浪接一浪令對手毫無還擊之力。
經驗夠老到 換人換得好
場上球員喺進攻同防守都跟足教練指示，場外教練團亦搞盡腦汁因應比賽變化作出相對應部署。教練費歷克上半場眼見巴黎聖日耳門「開始」有機會利用反擊空間策動進攻，隨即要求左右二閘阿方素戴維斯及甘美治唔好同時參與進攻，以減輕球隊防線壓力。此外，球隊原先計劃依靠阿方素戴維斯同高文喺左路製造攻勢，但基於安巴比移至右中場，費歷克隨即將進攻主線改為右路，冇幾耐入波即刻出現。其後，球隊換入古天奴及佩利鍚維持中前場活力及張力，以壓制巴黎聖日耳門兩閘出擊。最後，換入防守型中場杜利素，收起技術型艾簡達拿，連同哥列斯卡鎮守中路。
足球係團隊運動，團隊運動講求合作精神，一人走多一步大家互補不足，拜仁整個淘汰賽階段從來冇見過佢哋會互相指責，睇到嘅只有互相鼓勵。適逢近日係NBA球星高比拜仁生忌，各位球迷一定要將佢嘅MAMBA精神一直承傳落去，對自己熱愛運動抱著熱情、執著、堅毅不屈及毫不畏懼，向著夢想同目標進發！