【體路專欄】英超新一季開波啦，你隊愛隊踢成點先？第一周8場賽事戰果尚算正路，倫敦打吡戰阿仙奴作客3：0大勝富咸；水晶宮主場1：0力克修咸頓；紐卡素有新兵卡林威爾遜及軒迪歷入波作客擊敗韋斯咸；愛華頓作客艱巨地1：0擊敗熱刺；李斯特城、狼隊及車路士同樣贏波。不過，今周焦點梗係事隔16年重返英超嘅列斯聯，第一場就要作客晏菲路挑戰衞冕冠軍利物浦，三度落後情況下三度追平，可惜最終都係力戰而敗，究竟列斯聯點解令利物浦踢得咁吃力呢？
球員目標夠清晰 全場抗衡夠膽色
升班馬列斯聯今場表現贏盡球迷掌聲，就連利物浦領隊高普賽後都盛讚佢哋踢得好好！領隊比爾沙排出慣用4-1-4-1陣式，當然又可以睇成4-3-3陣式。喺防務工作上，球員分工非常清晰，每個球員都知道自己防守對象，中堅史德克全場跟足費明奴（可參考圖2-4）；左右二閘艾寧及達拉斯負責招呼沙拿及沙迪奧文尼；中場靈魂人物加雲菲臘斯需要覆蓋防守範圍甚大，除咗要看管進攻中場雲拿當外，有時候需要到左右兩邊協防及包抄；柏保路靴南迪斯及奇歷希防守目標則為佐敦軒達臣及拿比基達；左右兩翼艾達哥斯達及積夏利遜頻頻向羅拔臣及亞歷山大阿奴施壓。
球員防守目標清晰，有足夠紀律性遵從指示，三中場加雲菲臘斯、柏保路靴南迪斯及奇歷希貼服地看管對方中場，令列斯聯大部份時間能夠同利物浦抗衡。比賽4個失波全部來自死球，包括兩球12碼、1球角球及1球自由球，從球隊表現及數據上足以反映列斯聯盡咗最大能力將利物浦威力降至最低。當然，球隊防線必須提高集中度、搶截Second Ball及避免愚蠢犯錯。利物浦過去將進攻重心放喺沙拿同沙迪奧文尼身上，羅拔臣喜歡後上助攻但今場明顯受制於艾達哥斯達，而阿歷山大阿奴最擅長嘅長傳轉方向亦無空間發揮，間接令利物浦搵唔到上季強勢節奏，從而令比賽變得拉鋸。
踢出我風格 輸都無辦法
足球比賽對於球隊意義，除咗贏和輸之外，整體得著同樣重要。所謂嘅得着係指球隊喺比賽過程中學到什麼？實踐到什麼？改善到什麼？列斯聯今場貫徹球隊風格，崇尚後場地面組織，利誘敵方防線移前尋求進攻空間（可參考圖5），透過加雲菲臘斯中路個人突破，或者直接長傳到對方防線身後，利用艾達哥斯達及積夏利遜速度進行爆破。除此之外，門將美利亞左右腳腳法純熟，當球隊受壓可以成為最後選擇，繼而製造轉方向擊破對方壓迫。與此同時，大家可以留意圖5及圖6，單防中加雲菲臘斯與柏保路靴南迪斯及奇歷希位置相距甚遠，此舉動極為進取，目的除咗希望制衡敵方防線之外，更重要係為後場球員帶來更多組織空間，令對方處於被動狀態。
第一周英超8場比賽合共出現23個入球，仲未出場嘅曼市雙雄嚟緊分別迎戰水晶宮及狼隊，而兩隊升班馬列斯聯同富咸將會正面交鋒，最矚目大戰當然係車路士對利物浦，究竟林柏特大戰高普，邊個會係最後贏家？