【讀者投稿】李娜正式宣佈掛拍，身為佢球迷嘅我覺得來得太突然喇！
雖然佢退役其實係今年已經有跡可尋。由佢今年因傷患冇參加美網，加上佢嘅年紀對一位專業運動員來講都唔再算年輕，所以覺得佢應該就快退役，只不過係估唔到咁快。
我相信好多球迷喜歡娜姐除左係因為佢係中國人同佢嘅球技之外，仲有就係佢直爽同開朗嘅性格。記得未成為佢嘅球迷之前，我對佢嘅認識都係一知半解。正係知道佢同中國國家隊關係唔係太好同埋好“串“。直到上年，當我開始留意網球時，我就睇左好多娜姐嘅訪問，令我重新認識佢。發現原來佢係一個直爽、有性格、搞笑、友善，充滿自信嘅球員，睇佢打波更係一種享受。覺得佢有性格係因為佢當年可以因為不滿意國家隊種種處事方式，好灑脫咁同現任丈夫姜山離隊讀大學，拎左個大學學位；仲要身為少有有紋身嘅國家隊出身女運動員亦係另一個原因。
佢之所以俾人一種串嘅惑覺係因為佢直率嘅性格。十幾年前，當佢仲係比較年輕個陣，可能未太識得拿捏自己嘅情緒，有個句就講個句，係記者會上當記者問到一d比較敏感或冇意義嘅問題時，佢就會好大反應。而近幾年，佢對一d唔識做嘅記者態度依然強悍，但用詞就成熟左好多，俾人一種好有智慧同穩重嘅感覺。係大部分訪問之中仲會經常表現佢幽默嘅一面！
其實娜姐都已經32歲，離退役年齡幾近，但我之所以話估唔到佢會而家退役係因為佢年頭嘅一個訪問。佢好誠實咁講到，以前打波都係因為覺得依個係佢嘅職責而打。直到依幾年轉左新教練Carlos，終於學識點樣enjoy the game，搵到打網球嘅樂趣。加上今年九月係佢家鄉武漢將會舉辦第一屆嘅WTA賽事，之前佢一直都表現得好興奮可以係自己家鄉比賽，仲話要帶其實網球選手去食d地道野添，但睇黎佢腳傷真係太嚴重，所以作此決定。
娜姐係好多方面嘅第一人，以下係佢嘅威水歷史：
- 第一位嬴得WTA賽事冠軍嘅中國網球選手
- 第一位嬴得大滿貫單打冠軍嘅亞洲人
- 第一位世界排名前二和前三嘅亞洲網球選手
- 第一位嬴得女單、女雙冠軍嘅中國網球選手
- 最高排名同現今排名為世界第二
- 兩座大滿貫單打冠軍得主（2011年法網、2014年澳網）－ 係而家僅有嬴過至少兩個滿貫嘅六位女子單打之一
- 第一位獲得Nike批准嘅網球球員，比賽時於網球服上面可以有唔係Nike嘅贊助商logo, i.e. Mercedes-Benz同泰康人壽保險。（所有其餘Nike贊助嘅網球手衫上只可以有Nike嘅logo。就連Federer同Nadal都唔例外！）
雖然身為球迷，見到自己喜愛嘅運動員退休會有小小不捨，但其實同時都鄧佢高興。因為身為一個職業網球選手係要一整年度都過住非人嘅生活，一年只有1－2個月放假休息下。平時留係屋企嘅時間都冇乜，因為幾乎每日都要飛到去唔同嘅地方打比賽。相信娜姐會好享受退役後嘅生活。更何況，佢係佢退役封信入面都提到話佢會開網球學校，同埋會用運動黎幫助有需要嘅小朋友。
娜姐！祝你早日康復，之後繼續以你運動家嘅精神同開朗嘅性格去幫助其他人！
體路讀者 Natalie，為beats/mi的創辦合伙人，並以此平台來分享我們兩位女生對香港體育發展的感想和支持 (Facebook: beats/mi, Instagram: beats.per.mile)