如果入樽係籃球場上最震撼嘅畫面，咁「穿針」就一定係最美妙嘅旋律。20多碼，起手，Chop一聲，籃球應聲入網，何等爽快！不過，要「穿針」，就要射波；要射波，就會炒粉。而講到炒粉，就不得不提「籃框殺手」－高比拜仁。
雖然單論Win Shares (勝利貢獻值)，高比仔今季完全比唔上同位置嘅「罰球王」－James Harden，但作為紫金軍團嘅精神領袖，此位近十年來嘅「NBA第一SG」依然主動攬責，務求以得分拯救湖人！
經歷上季嚴重膝傷之後，呢位球隊「大佬」嘅射失率已高達60%，平均射23球都入唔夠10球，對於佢呢啲球王級別嘅明星嚟講，絕不容易。
今早對灰熊，高比就26射中10，chok夠16球「鐵」，生涯累積13,421球missed shot，超越塞爾特人名宿John Havlicek，榮登「炒粉榜」榜首。雖然最終湖人以102：107憾負主場出擊嘅灰熊，高比仍笑看此里程「悲」：「我冇留意呢味野喎。」盡顯球王風範。
以後，高比每射失一球，就會刷新「炒粉界」嘅紀錄！
而家，就讓我地一齊見證昨早破紀錄嘅一刻：
好，認真咁講，今季湖人班波，除左高比其他人得分能力實在唔高，連佢大傷過後依然要搏命搶分，其實真係難為咗佢……
利申：拜仁球迷，不過係德甲嘅拜仁