【體路專欄】雷霆886並唔係電台雷霆881嘅fd子，而係呀言真心想同今年嘅雷霆say goodbye。
就算閣下係雷霆球迷都係咁話，哩隊波完全係打兩條友，Westbrook同埋Durant引用美國reddit巴打嘅說話，雷霆有兩種戰術：
1. Durant Isolation
2. Westbrook Isolation
所以，上年季後賽，雷霆憑Westbrook嘅殺神級表現，打到入西岸決賽也好，咪又係2：4輸比「打整體」嘅馬刺。
雖然雷霆雙子能力上開始步入巔峰，但試問單靠兩名心態並未成熟（一個開始擺大爺款，一個經常腦袋短路）嘅球星，隊波又如何能夠係競爭激烈嘅西岸脫穎而出呢？
上場對76人，係第三節中後段，領先13分嘅情況下，Westbrook突然入魔，無視任何障礙（包括隊友），單挑Michael Carter Williams，最尾以一球3分airball 完美作結。雖然平時嘅Westbrook冇咁令人費解，但亦差唔遠；而老大Durant呢？伸左兩次手，發覺Westbrook已經旁若無人之後，選擇「食花生」，而唔係拉開到45度角，為隊友創造空間。如果係小牛、馬刺、灰熊等球隊，以上情況只會係打緊nba 2k15時出現。
片段重溫
面對隊波6勝13負，排西岸尾四嘅困境，Durant話自己好快會搵返節奏，Westbrook就話完全冇擔心季後賽名額嘅問題，擺出一副大無畏嘅樣子。但雙子齊腳出返嚟兩場，一場輸比西岸第11嘅塘鵝，一場靠所謂單打戰術，贏不值一提嘅76人（我諗正常情況之下，冇咩可能輸比佢地），似乎完全比唔到上年西岸2nd seed嘅表現。學江華話齋，其實我知道你呢，對自己好有信心，但你嘅問題就係，對自己太有信心。
西岸列強今年齊齊升Lv，雷霆雙子就停滯不前，依然掛住自己逞英雄，得罪講句，入到季後賽，只會同上年一樣收場。