上次介紹過一啲「上交叉綜合症」要伸展返嘅肌肉，今次到講吓要鍛煉嘅運動喇……
首先呢組肌肉唔係人人識，佢叫「深層頸屈肌」。
先講講一個正常嘅頭部體位，從側面睇應該係耳珠同肩膀成一直線嘅(Check point)，如果頭部位於界定線前，我們都會判定為「頭部前移」。
唔好以為頭部前移好似無咩事，你個頭約一個8磅重嘅保鈴球，頭部前移會影響身體力學，你試吓日日吊住個保鈴球係條頸前面，睇吓你條頸痛唔痛~
我地可以透過強化「深層頸屈肌」去改善「頭部前移」嘅情況，相信大家都對「深層頸屈肌」這組肌肉較為陌生，之前提過現代都市人因經常對住智能手機、平板電腦、桌上電腦，大都會出現”上交叉綜合症”，”上交叉綜合症”其中一個特徵就係深層頸屈肌過弱，導致頭部前移，而頭部前移又會比頸椎帶來更大嘅壓力，最終可能出現肩頸痛影響上肢活動。
動作1:
(圖1)呢個就係頭部前移嘅位置，然後將頭部向後拉，拉到耳珠跟肩膀成一直線止(圖2)，保持約1-2秒後回到自然位置，每次重複10-15次。
動作2:
直接到(圖2)位置保持約10秒然後回到自然位置。
動作3:
我地可以利用一些小工具如健身球/厚毛巾放到頭部後方(圖3)製造阻力，然後向後推加強訓練效果。
以上動作緊記整個過程都要保持腰背挺直、雙肩放鬆鎖肩及控制呼吸
以上幾種深層頸屈肌嘅exercise，係家中或辦公室都可以輕易進行，大家不妨做多啲、做多啲、做多啲……
下次再介紹埋另一個要鍛煉嘅exercise – 坐姿划船
敬請留意我係Sportsroad嘅Blog或者我嘅Facebook Page “高級私人教練 Jerry Liu“，多謝支持!!