【體路專欄】上星期日係nike5人賽決賽日，先恭喜淦源成為公開組冠軍，一如以往，我地夏體硬都拉隊去麥花臣踢表演賽，今年玩法仲有d特別，就係唔係踢5人，而係踢4人賽。
相信當日有去麥花臣既朋友，都會見到有一個大蚊帳咁款既野，個4人賽就係裡面個細場踢架喇，玩法同5人賽有咩唔同呢？簡單黎講：
一，就係兩隊都無守門員，禁區內唔俾掂波，假如攻方掂到就守方罰球，守方掂到攻方就射點球，而點球就放係中圈踢，無人守龍，射埋去中就有架喇。
二，邊隊失第一球，就要減一個人，即係3打4，呢個時候邊隊攻入第二球就當贏，即係話攻入第一球既意義就係令對面踢少個，自己有優勢，亦都鼓勵輸果隊放膽進攻。
咪以為3打4踢多個一邊一定有著數喎，根據nike提供資料，呢個玩法係巴西試玩既時候，通常都係踢少個果隊贏，我地夏體硬當日分成兩隊，對住踢小球出曬名，同樣分兩隊既milk，A隊居然有4勝1和2負佳績，實在值得開香檳。
由於當日唔打龍門，所以兩位門將可樂暉同黑龍波，就分別為A、B隊串演前鋒同後衛，由於可樂暉近年龜縮係大埔郊區過住d半退休生活，足主我都俾足機會佢過下腳癮，有點球都俾佢射，點知佢真係射出一腳秒速唔夠三米既地波入網，全場賽事不斷奮身攔截，又一次令大家跌眼鏡。佢賽後同我講，話成世仔未試過踢波踢得咁開心，男人老狗講到喊苦喊忽咁，我話你唔洗多謝我，你多謝富足主就得喇，如果唔係富足主缺席，以佢老人家既方丈性格，唔好話出黎踢，執波都無你份呀！
國足主
