【體路專欄】記得有朝喺大坑東遊樂場慢跑草地時有位朋友問我，點解你來跑草地嘅？有咩用架？
林路、越野路、草地都係比較難跑嘅地面，地質比較鬆軟，蹬地時會損失較多能量，令人覺得軟綿綿發唔到力，跑步節奏亦難以保持，咁點解咁都去跑草地呢？
相比起石屎地同田徑場，跑林路、越野路、草地無咁傷腳，每一步落腳嘅力好大部分俾鬆軟嘅土地吸收，每一次落腳腳底要用力去抓穩，刺激下肢力量發展，從而下肢支撐和抓地將變得更有力。
另外，因為地面唔均勻凹凸不平，要迅速適應落腳點以防止身體失去平衡，依個過程能強化本體感覺（proprioception）同神經肌肉（neuromuscular）嘅控制，鍛鍊腳掌嘅小肌肉同腳腕穩定性，日後喺公路或田徑場上跑步就變得輕鬆啲。
下星期會講吓喺林路、越野路、草地進行訓練時有咩注意嘅地方。
知多一點點︰
本體感覺是指肌肉收縮、屈曲、伸直、推拉，以及骨骼與骨骼之間關節的壓縮所引起嘅感覺資訊，肌肉和關節係本體感覺嘅感受器，本體感覺信息包括感知運動中關節位置、活動、方向以及速度的能力。
神經肌肉控制是在無意識情況下對關節活動產生的不自覺反應。
文：香港跑手屈旨盈