【運動員網誌】2020 年的你過得好嗎？無論你覺得自己過得幾唔好、幾咁慘、幾咁辛苦都好，我可以講一句「你一定過得好！」
還記得一年前的自己怎樣嗎？在去年年底時定下的目標，到依家完成咗幾多？
如果你覺得自己現在身處邊一個位置，我想請你停下手上的工作和思緒，俾一分鐘時間自己，深呼吸。在寂靜的當下，你聽到自己的心聲嗎？
在過去的一年，我們失去了很多，時間、朋友、金錢、旅行的機會，但這個世界好公平，有失就必有得，我哋多咗時間陪伴自己、屋企人或心愛的人。
我哋認識到快樂其實好簡單，一家人齊齊整整，平平安安，無病無痛，行得走得，食得瞓得已經好幸福。
我哋無得飛去外國吃喝玩樂，在本地走入大街小巷發掘以前從來無留意過的人事物。我哋去行山，走一啲從來都無去過嘅地方，才知道香港原來仲有咁多美景（請謹記自己垃圾自己帶走）。
世界轉得太快，我哋腳步走得太慢，但唔等如我哋無進步；就算無人欣賞（或無人有餘閒欣賞）我哋要學懂欣賞自己向前一小步，都係一種進步。
而我嘅睇法係，當全世界都在向前進步時，就算你留在差不多的位置，都已經係一種努力，就好似逆流而上，留在同一位置已經要花費很大氣力，所以我哋唔好一味爭扎，要冷靜，觀察，再作決定。
珍惜現在擁有的，有啲嘢過咗就無，留得青山在，哪怕無柴燒，只要有健康的身體，想做乜想去邊都得，襯呢段時間好好裝備增值自己，機會一來就可以發揮。
香港人，共勉之！