可能我經常係呢個專欄，將可樂暉有咁大吹到咁大，早排居然有個甲組球迷問我，假如有一日，可樂暉入選香港隊，我會唔會唔放人喎。
啼笑皆非。想澄清一下，其實一直以來我專欄裡面出現既可樂暉，只係我心目中既可樂暉，就我個人來講，我覺得可樂暉假如出盡奶力開掛爆seed的話，以業餘波、小型球水準黎講，佢係一個非常不錯既龍門，咁當然啦，奶力唔係時時有，seed都唔可以日日爆，要可樂暉長期保持佢既「高水」，係一件難事，好多人睇完我既專欄會覺得可樂暉係一個神級門將，睇完真人表演又覺得不過爾爾，其實唔單止其他人，我覺得我個人同其他隊友，對可樂暉既睇法都係有分歧有落差既，打個比喻：三國演義裡面既趙雲，神級事蹟一堆，但正史呢？拗到而家都仲拗緊。
所以呢，各位「可粉」，不妨將可樂暉當係武俠小說裡面一個大俠，甚至將佢當係一個虛擬角色好了，留一點想像空間，世界會很美好。
甚麼入選香港隊放唔放人？無可能既野就唔好問喇！
不過呢，如果真係有奇蹟發生，或者阿kim有眼無珠…咁我都會放人既，畢竟我都明白，作為一個球員，業餘好、職業好，能夠為代表隊上陣，都係無上光榮，而我雖然係一個間唔間就係FB出STATUS問候政府問候地產霸權問候自由行既香港人，睇落好似好想搣甩香港人既身份咁，但作為體育記者既我，其實都明白香港人應該支持香港隊呢個道理，所講既支持，「笨」唔係簡簡單單口講就算，而係要略帶少少唔計較甚至犧牲少少自身利益去支持先ok，我都明白，如果真係放可樂暉代表港隊，到時夏體硬無成績，個個都會「SMALL DOG」我，富足主又會乘機迫宮，不過有D野，係要擇善固執既。
越講越遠添，今日講到呢度啦，多謝收睇。
國足主
