估唔到選一個可樂暉做足球先生有咁大風波，真係唔知係可樂暉名氣累事定點，睇到富足主上期為可樂暉當選呢件事大做文章炒蝦拆蟹，小弟真係覺得好悲哀。
小弟同好多波友一樣，都有踢開坊間o既業餘七人比賽，大大話話都踢左接近十年，石地王凱揚七人王EZ皇者甚至再遠d既冰冰樂同Hero7全部都踼過，耳聽目聞幾多球隊響朵之後突然間成績滑落甚草草收皮，幾多球隊一有名氣就比人採礦咁挖角挖到唔夠人開波，歸根究底，都係一個問題，就係凝聚唔到一班人。
點解呢？人紅自然就事非多，好波自然多波友，靚女都多人溝啦係咪？通常好波既都唔止踼一隊波咁少，而好多球隊為左留住呢類星級馬，好自然就會厚此薄彼，遺忘一班一直不離不棄打江山o既功臣，呢班功臣好多都係對隊波有深刻感情，有時有d重要比賽甚至take個AL去踢都有，你對佢地唔好，又點會留得住呢班人呢？到你有重要比賽唔夠人開波，最熱心過o黎幫拖o既會係邊個？心照啦各位領隊。
所以，即使可樂暉表現海鮮價，即使佢明知出迎會甩手都照嗌keeper然後真係甩左手再用責怪眼神望住你，即使佢可能真係好似傳聞一樣…係弱智o既，但佢為球隊立o既汗馬功勞，幾年前點樣技驚四座撲出十二碼，即使今年上陣少左又肥左，但佢都甘願做一個球場出氣袋比大家發洩出氣，淨係呢份忠直，都應該比番個肯定佢啦係咪？
至於富足主用呢件事引伸到我「棄明保暉」，離間我同小明之間o既感情，我只能夠講，我對呢種非黑即白o既思維實在不敢恭唯，而家香港社會實在太多呢種諗法存在，愛港力就是一例。
國足主
