【體路專題】欖球運動愈來愈受歡迎，相信唔少讀者對欖球嘅玩法、規則已經非常熟悉，但關於欖球嘅世界紀錄大家又知道幾多個？今期#RugbyFriday 同大家睇吓有關欖球嘅「威水史」啦！
1. 史上最巨型欖球
呢個全世界最巨型欖球係國泰航空於2013年為香港國際七人欖球賽造勢而製，巨型欖球以正宗欖球原料製造，高2.9米，長4.7米，直徑2.9米，當中更可以容納超過3,300個標準尺寸的欖球！
2. 欖球可以有幾快？
2011年一班職業欖球手喺英國街頭挑戰「史上最快傳球」活動，最終22歲嘅Joe Simpson以時速77.25km 創造出史上最快嘅傳球。
3. 打欖球打足一日一夜？
究竟鍾意rugby可以去到幾盡？英國慈善團體Scotty’s Little Soldiers 同Armed Forces XV曾舉辦一個長達24小時51分鐘嘅馬拉松式欖球賽，最後Armed Forces XV以1742：828擊敗Scotty’s Little Soldiers。不過原來佢哋飯都唔食、覺都唔瞓咁打欖球只為一班戰後孤兒籌款，致敬！
4. 四千人化身毛利族？
新西蘭隊習慣賽前跳毛利人戰舞（ Haka），相信好多球迷都好鍾意睇。法國就有4028名欖球迷一齊於球場上大跳Haka，唔知即將舉行嘅Hong Kong Sevens 會唔會睇到呢個場面呢？
5. 史上最快達陣
2013年一場英國職業聯賽創造出一個最快達陣紀錄，Doncaster Knights嘅翼鋒Tyson Lewis只係用咗7.24秒就完成達陣，一齊睇下佢點做到！
6. 史上「瞓地」最多球員
前日本代表選手大畑大介在國際欖球賽事中，以69次達陣成國際賽「史上達陣最多」的球員。雖然佢2011年因傷患已經退休，但呢個紀錄至今仍然仲未有人破到！等我哋一齊重溫下佢1999年於香港七欖中對蘇格蘭嘅精彩達陣！
7. 單場得分最多球隊
於1994年嘅一場國際賽中，曾經有一隊造出26次達陣、取得164分的驚人紀錄，大家又估唔估到係邊隊？南非、英格蘭、新西蘭？原來創出呢個紀錄係我哋香港隊！香港隊於1994年世界盃外圍賽中以164：13大比數贏新加坡，認真威水！呢個世界紀錄暫時都仲未有隊伍破到！
8. 最巨型鬥牛陣
平時睇欖球，即使係15人欖球，兩隊鬥牛球員最多都只有16人，但為了即將舉行的2015年欖球世界盃造勢，英格蘭欖總就召集1,008個人完成一個「巨大牛陣」！雖然呢次巨型鬥牛沒有如比賽一樣有激烈碰撞，但場面就相當震撼！
圖：網上圖片