【體路專欄】無見一排，今次係我，我係國足主，唔係富足主，希望大家唔好認錯。
點解咁講呢？事關上次NIKE 5麥花臣搞總決賽，我地先賽和勁旅MILK，再大勝兄弟幫贏左邀請賽冠軍，有球迷向住我大叫「富足主加油」，我當時感覺唔係嬲，而係有股淡淡哀愁，試問積極操fit自己既我，同終日上網寫衰我講我壞話既富足主，邊。忽。似。先？
自從富足主篡位失敗之後，意志消沉，終日拎住部IPHONE瘋狂打機，身形已經同退役既朗拿度睇齊，有隊友更加暗地裡幫富足主起左個朵叫「肥 _ 淦」，據聞呢位隊友下屆都好大機會離隊他投。作為足主，我當然希望呢位昔日球場上既兄弟振作，所以我特登叫佢搞左個「HARTIEND F.C. 夏體硬足球隊專頁」，希望佢能夠係隊波裡面搵番自己位置。
講番隊波啦，由於上次記協盃四強遇上暴雨，呢場四強賽就延期到5月1號舉行，我地夏體硬將會遇上記協盃宿敵TVU，翻查往績，TVU可以話係我地剋星，同TVU交手咁多次我地都係輸多贏少，當中包括上屆踢成0比0，互射九碼輸埋，所以球隊上下都當呢場波係決賽咁打。
以下係賽前預計陣容：
守門員：唔知
後防：或者有阿聲、可能有紀恩、正謙都有機會
中場：靚仔威、更靚仔既阿MING
前鋒：唔排除由我掛帥
賽事5月1號大坑東細場上演，0930開賽，不收門票免費入場。
國足主
