【體路專欄】上星期夏體硬踢o左今季記協盃最後一場分組賽，結果以6比0贏o左娛力，4戰全勝以A組首名出線8強，5月10日會同C組次名爭4強席位。
今屆我o地4場分組賽，總共入o左20球，不失1球，成績同上屆一樣，唔同o既係，上屆分組只有4隊，今屆有5隊。
由於賽前已經篤定晉級，所以o係最後一場分組賽，我o地偉大o既國足主又作出驚人之舉，就係以守開龍o既山林虎串演左閘，反而自己走去守龍，結果上半場踢到成隊曼X咁，差o的以為心口贊助轉左太興。好在佢都知衰，下半場立即撥亂反正，執番正個陣，最後先可以順利贏波。
今次故事亦都教訓o左大家，自己唔係擅長o個個位，就唔好咁大想頭，尤其係出線之後已經係淘汰賽，唔可以再輕敵。
講到呢到，要借少少位恭喜我o地創會成員馬菲爾，o岩o岩勇奪香港報業公會o既攝影獎，o係體記春茗當日更加連中三元，成為新一代獎聖，只可惜o係壓軸抽獎輸o左畀一位前行家。不過唔緊要，係你o既始終係你，若果唔係你o既，就算畀你抽中都會有大把手尾跟，建議呢位仁兄搵定律師都得喇。
富足主
