人地話香港社會越0黎越缺乏包容，我不嬲都無乜太大感覺，因為我份人不嬲都好豁達開通，好似富足主寫呢個專欄，下下去盡黎入我串我潤我質我，我都好尊敬佢，就知我份人對包容呢兩個字，唔單止理解，仲講得出做得到。
▲圖為富足主日本考察圖片。
呢，就好似今個禮拜咁，富足主無啦啦又話要去日本考察，一句唔該就拉埋靚仔中鋒+him同有「夏體硬肥柏金」之稱既昌昌過去，就咁掉低d會務唔理，我都無發爛，笑笑口同佢講：「唔，好啦，玩得開心d，睇多集AV」，有留意開我地專欄既朋友都應該會記得，對上一次富足主去日本考察，都係無幾耐之前既事，去得咁密，坦白講呀，考乜鬼野察呀？玩就玩啦，喂，你去玩唔緊要呀，問題係以考察為藉口，乜差都開公數，我地本身會費已經唔多，用下用下已經近乎乾塘了。
所以呢，成日聽到而家d人話d公司淨係識肥上瘦下，老細級就餐餐鮑魚頭等機位，打工既就連叫碗仿鮑片米線都要諗過度過咁，真係好有同感，我記得早排我地後防大將阿聲弄瓦之喜，身為足主既我好想聊表心意送份賀禮，一睇個會筆數，再諗諗下一季球會開支，oh sorry，即時收左皮，我唔想搞到下一季簽新球員開個記者會要去M記度開咁鬼大鑊，更加唔想唔夠錢book場淨係book得一節，結果成隊練波剛剛跑完圈都未練戰術未踢分組賽就比阿姐吹雞趕走，香港球圈，心照啦老友，有錢都要識得用，無錢就人人喊打同落水狗無乜分別，好似我地呢d，開支唔多但收入亦係雞碎咁多既業餘波黎講，一分一毫都唔可以浪費。
可能富足主既思維已經同歐洲富豪球會接軌，以為個個月出外工幹先有派頭，可憐我呢d，名義上做大，實質上打雜仲要睇實盤數既足主，有苦自己知，唯有寄望富足主係日本果邊真係工幹，班到條大水喉返黎射住射住，咁我就算期期係呢個專欄比佢清算，都仲有個理由去安慰下自己。
國足主
