大家好呀，全靠FB的當年今日功能提醒好耐冇喺體路打Blog了~ 今次想同大家分享一下啱啱今年四月去美國LA之旅。呢一次LA之旅緣起Kobe宣佈今年常規賽完結之後將會退休，我就「的起心肝」一定要去主場睇一次！如果唔係老咗一定會後悔！（誇張）
可惜呢場對熱火嘅比賽Kobe只上陣咗9分鐘，得2分就退下火線，幸好場比賽精彩，打加時最後更贏埋，係本季Lakers史上最差球季（17勝65負）中其中一場勝仗。
其實我都係第一次睇NBA，因為之前去美國都係Off-Season。
今次除了睇Kobe之外，亦都有計劃地安排幾乎每晚都去睇波，不過就唔單止係NBA喇！例如有NHL （National Hockey League），即係冰上曲棍球。
係咪好熟面口？冇錯！因為呢度都係Staples Center！前一晚打完NBA，跟住果晚就已經換晒整個場的Setup！
接住仲有MLB（Major League Baseball）美國職棒聯盟，呢一場係LA打吡（LA Dodgers對LA Angels）季前熱身賽，相比起之前NBA同NHL毫無冷場嘅緊湊節奏，MLB相對慢好多，問起當地人，佢哋回答其實棒球球迷其實都係志在幾個朋友去飲啤酒食熱狗吹水，事關棒球每一球每一回合都係分開來，出現全壘打，絕對係趕得切反應過來望，而令觀眾屏息靜氣、最期待的畫面，莫過於滿壘時攻守雙方的大鬥法。
身為排球愛好者又點少得去睇排球，不過美國未有職業排球聯賽。好彩撞正臨走之前最後一晚有一場NCAA大學排球賽，場面雖然冷清好多，而水平上亦比起以前睇過的國家級比賽低，但係都令我大開眼界。
後記
其實一直都會喺電視、電腦上睇波，現場睇當然係另一種感覺。商業化的職業聯賽，球場每一角落每一秒都是商機，成件事根本就好似睇演唱會咁，係一門娛樂生意。大鄉里出城，少見多怪，有怪莫怪。