【體路專欄】我係高比拜仁（Kobe Bryant），有人稱呼我做「黑曼巴（Black Mamba)」，亦有人叫我做「小飛俠」。為免大家聽到「小飛俠」個名，將我同靚女主播林燕玲撈亂，我同大家簡單介紹自己。
六歲仔我已經同籃球情定今生，成個職業生涯我只效力洛杉磯湖人一隊，足足二十年！借用大台《巾幗梟雄之義海豪情》角色柴九一句經典對白，「人生有幾多個十年？」我兩個十年都喺紫軍球隊渡過，主打後衛，得分後衛。
七次打入總決賽，五次奪冠而回、兩次總決賽MVP、一次常規賽MVP、十八次入選明星賽、四次明星賽MVP、十一次入選年度最佳陣容一隊、九次入選年度最佳防守陣容一隊，太多榮譽我唔一一細數，想知可以百度一下。
（自從我去咗北京打奧運比賽後，我發覺百度好用過Google，所以連我身邊朋友都迷上百度。）
作為當代最接近籃球之神米高佐敦（Michael Jordan）嘅男人，有好多球迷愛上我，亦有人覺得我神憎鬼厭，有時我都幾唔開心，點解我咁努力訓練，都有球迷唔鐘意我？直至最近我喺網上知道香港有一個擅用賽馬角度分析唔同運動嘅主持人之後，我發覺原來我可以過得更開心。
「唔鐘意我可以訓覺，可以唔睇我！」一言驚醒夢中人，咁有霸氣嘅說話，點解我以前無諗過？
呢個叫「荷蘭叻」嘅主持人霎時令我對佢產生興趣，我即刻叫我助手幫我百度一下佢仲有咩金句出現。
嘩，唔睇尤自可，一睇，原來佢8年前北京奧運已經好留意我，甚至洞悉我埋藏喺心入面十幾年嘅不滿！
「既然高比拜仁咁好波，點解要打後衛？」
「高大廢」K布朗-唔識入波嘅前鋒
同我合作過嘅垃圾中鋒同前鋒真係十隻手指都數唔晒，最令我印象深刻，一定係「高大廢」K布朗（Kwame Brown）！
記得有一場常規賽對活塞，個場比數拉得好緊，好多球員Mark實我，我唯有「被迫」傳畀籃底空晒嘅K布朗。點知條友接唔到個波，睇住個波出界！
我當然好嬲，正想發火嘅時候，K布朗過嚟同我講：「下次我再有空位嘅時候，唔好傳畀我！」
當時我真係O晒嘴，問佢依個係咩玩法，K布朗竟然答：「因爲我好緊張，如果我接到波對方會對我犯規，你知我罰球又唔準！」
前鋒唔入波你做咩打前鋒？罰球唔準你唔去練？點解K布朗你唔去打後衛？
有一段時間我問自己，點解咁多年我咁好波都要打後衛，無得打前鋒？
臨老學做生意，一定要請教阿叻
但我明白到，唔食屎又點會有飯食？只要肯食屎唔拉布，一定有飯食。
終於到我退休前兩年，教練安排我改打小前鋒，一個夢寐以求嘅位置，終於可以全力進攻，最後一場比賽我入咗60分，對得起前鋒呢個名！
我極度後悔當日放棄最後一次代表國家隊嘅機會，無去到里約拜見我心靈偶像荷蘭叻。
如果有機會見到荷蘭叻，我一定要請教佢做生意嘅心得。由搞過上市到欠落巨債，由欠落巨債成功翻身，荷蘭叻嘅人生，實在太大起大落！如果荷蘭叻肯過兩招畀我學識風險管理，甚至帶我殺入中國13億市場，我副身家，應該可以再升十倍！
