2013年踏入咗大半個月，亦都係世界各地各項賽事嘅下半季，正所謂好戲在後頭，無論你鐘意邊一項，我諗大家都離不開足球同籃球。
英超踏入下半季，廢話唔多講，眼見曼聯順風順水，真係睇到老費有幾多料子，班底有幾平均。雲佩斯有幾勁唔多講，一次又一次令班波死裏逃生，令人睇到津津有味。其實我係曼市粉絲，係！我係兩頭蛇！我兩隊都鐘意！曼城實力係有，不過⋯⋯炒咗文仙尼先啦！（下刪一千字，因為大家都會有共鳴，無需多講。）每次見到文生頭痕閉翳個樣，我不禁⋯請你離開。
小弟雖然少睇NBA，不過都略知一二。明星賽投票結束，無乜驚喜，又係果幾個。睇就睇教練揀嘅「後備」名 單吧！有網民問點解林書豪唔可以承接住姚明個勢，霸返個正選位。其實有三個原因。1，西岸競爭好激烈，個個有番咁上下；2，今年又傷又跌watt，已經無咗LINSANITY了；3，最重要嘅係，佢唔係我地親愛嘅祖國人民，佢係台灣人⋯試問無咗13億人民嘅票，篤數都篤唔到俾你啦大佬！所以話呢，公關是非常重要的！多啲講中文，玩下微博、wechat，可能會幫到佢呱⋯！
樑哥