【體路專訊】季尾傳出散班消息的陽光元朗，今日五一勞動節假期踢本季最後一場主場戰。在2006名球迷支持下一度領先兩球，唯最終仍被香港飛馬逼和3：3，未能贏波告別元朗大球場。
由於聯賽爭霸及護級形勢均已成定局，今季港超聯只餘下名次上的角逐。同日東方龍獅以5：0大破篤定降班的標準流浪，肯定以第4名衝線，至於亞軍席位則為飛馬及和富大埔之爭。假若飛馬今日全失3分，煞科戰對大埔便須贏波。祖連奴37及48分鐘梅開二度，一度令主場球迷興奮不已；飛馬66分鐘由方栢倫窩利抽入追成1：2，但老將法比奧10分鐘後建功，助元朗再次拉開兩球優勢，只可惜最終仍未能保持勝局。利馬79分鐘射入極刑，加上89分鐘頂入，連下兩城助飛馬死裡逃生，逼和3：3倖保1分。
飛馬在聯賽與大埔同為17戰得34分，但前者以較佳對賽成績排次席，意味著最後一戰只要不敗即可得亞軍。近年轉趨低調的班主羅傑承賽前與身兼董事的兒子羅旭峰現身握手禮，對於早前有球迷憂慮球隊來季去動向，羅生向大家派發定心丸：「我哋一定繼續搞，而且唔會組青春班，球隊只係3、4個球員走，大部分同外援都已經續咗約，希望有機會再踢亞洲賽。」
元朗的去向也同樣惹人關注，會長王威信賽後透露，有新贊助商磋商中，但成事機會只有一半機會：「距離5月31日期限前仲有一個月，有啲確實已經傾緊，係有別於以往搞開波嘅新贊助，但現時進展一般，成事機會只係五十五十。我哋會睇吓係咪可持續發展，同埋財政上唔好爛尾，呢兩點好緊要。」
圖／文：文森特