【體路專欄】「大鬍子」James Harden昨日25射22中，以超過80%命中率斬下27分，帶領火箭以100：92「逆襲」灰熊，真係要寫篇文賀一賀佢！
咪住先，25射22中又會得27分啦，當Harden一球三分都冇入，都起碼44分喎，阿言，你呃人！錯，阿言冇講大話，事關Harden 25射22中係罰球數字尼。其實我都明點解大家會有咁嘅錯覺（當你地真係信佢Field Goal有八成幾命中率啦），因為Field Goal起手廿五次，其實唔難，只要射多啲、射多啲、射多啲就得。
但Free Throw起手25次係咩概念呢？係要最少比人係三分線犯Shooting Foul八次，再加多一次技術犯規罰球，如果冇阿言上篇《造王者－籃球篇》入面所提球證「誤判」，都真係幾難。
不過，對住draw foul能力極強Harden黎講，只要頭一搖、手一擺，就有兩球罰波射，25次起手其實都唔算難（當然呢個都係佢嘅個人最佳紀錄）。而且，學部份火箭迷話齋，佢今日係用條命去衝擊內線，比多幾球罰球佢都好正常姐。
灰熊帶住13分優勢入第四節，最終被翻盤，真係慘慘豬。但係，我覺得灰熊係抵死嘅！你明知James除咗鬍鬚長，連體毛都特別長，咁你守佢果陣咪醒少少，放佢剷，搏佢炒粉咪算囉，無謂賠上一次犯規，又免費送佢射兩球罰波啦。但灰熊偏偏就係關鍵嘅第四節，送Harden上罰球線十次，實在唔抵可憐。
「黑熊」Zach Randolph話呢場火箭係八打五，因為三名球證都係企係主隊果邊。你都姓賴嘅，對面Howard因為犯規麻煩，上得18分鐘，難度球證唔係偏幫緊你果邊？
Harden上次「插水」已經係個幾月前嘅事。