【體路專欄】NBA有三十隊球隊咁多，要脫穎而出成為球迷關注對象，離不開兩個原因，一係要擁有超級巨星壓場兼戰績出色（例如熱火、雷霆），一係大打快樂入球，不斷製造ALLEYLOOP入樽或者狂射三分波（例如快艇、勇士），如果兩樣都無，等做邊緣份子啦。
雖然帝王隊至今戰績只係15勝27負，喺強手如雲嘅西岸成為尾二哥，但佢地創新大膽嘅Marketing手法，成功吸引到球迷甚至非球迷嘅注意。
首先國王隊宣布由今年3月1日起，球迷可以用比特幣（Bitcoin）呢個近半年勁Hit嘅虛擬貨幣去買波飛同球隊產品。相信有留意財經新聞嘅朋友都知道，每一比特幣五年內由13蚊美金一度升到超過1,200蚊美金，但由於比特幣缺乏監管，好多監管機構提醒，擁有者必須承受風險。
Touch Wood比特幣價值跌至零，對帝王隊嚟講有咩壞處？反正波飛同球隊產品賣唔出，擺得耐只會淪為垃圾資產，如果因為接受比特幣而吸引球迷消費，何樂而不為？
另外，帝王隊早前決定讓部份球員、教練、啦啦隊美女同現場講波佬戴上Google眼鏡，畀觀眾感體驗唔同人士嘅第一身視角，創意十足！希望未來NBA會參考帝王隊做法，畀觀眾體驗更真實嘅現場體驗。
帝王隊上述兩招成功令球隊獲得傳媒同球迷關注， 用咁低Marketing成本做到呢個效果，贏晒啦！
